NANG

Mit khap kâr leka ral tur mah ni se,

chu aia thlan tur ka nei chuang em ni?
Hrilhhai-mangangin min liamsan dawn la,
mittui nen min hnungchhawn dawn mah la,
nang aia thlan tur tunge ka neih chuan ang?

Hriat reng tur NI KHAT min pein,
dâwn kîr turin vawi khat chauh pawh min fâwp ni la,
chu aia thlan tur dang ka nei lo vang.

Hringnun hian Tahna ruâmah min dahin
neksâwr turin min vai liam mah se,
ka lungngaih chhan erawh NANG i nih chuan
dam hian man a nei ngei ang.

I lakah eng ka beisei lo va,
malsawm nih ka châk hek lo;
mah se, hei erawh ka thlahlel thin –
ka nuna NANG i awm ve hi!

Read more »

MANGTHA TIH MAI ZAWNG (True Story)

Thlahleinga zân a ni a, vân chu a thiang hle mai. Nipui lâi mah ni se, zan boruak dâi leh thiang kâk mai chuan ka biang chu dim tein a rawn chhem heuh heuh a. Ka pindan kawngkharah chuan ka dâk a, vân zaupui maia awmze nei taka inrem arsi, mawi taka pe uar mai chu ka thlir a; thâwk leh khatah dan rual lohvin ka mit atang chuan mittui hi a rawn luang zawih zawih a. Ka thinhnûn chu thal hriam taka vih ang maiin a thîp vawng vawng a, ka tisate chu an khûr a, mit leh benga hmutute tâna hriatthiam theih rual lohvin ka thinlung chu na tuarin a rum vawng vawng a.

Di lenmawi suihlung dumtu,
I kimtlang zawng a mawi ngei e;
Kan thiamthu di zawngte kha
Tawngmang mawl mai em lo ni?

 
Ni, a mitmeng Bengal tuipui anga paw no ruâi maia min melh chunga, “Bawihte, hringnunah chuan eng pawh kan hmachhawn a thiang a, pai chawn chawna kal a ngaih châng pawh a la awm ang. Mahse, keiin nang ka hmangaihna che leh, nangin kei min hmangaihna hi ‘thu’ maia thiah theih a ni ngai lo vang,” a tih lai kha fiah em emin kawl phe ang maiin ka suangtuahna mitthlaah chuan a rawn lang a.

Kum thum teh meuh kan inzui hnu pawhin a aw ri thâwp sat chu ka suangtuahna bengte chuan an la ngaithla kham mawlh lo. Dawt thu lêng vêl avanga ka thian kawm ngei ngawih ngawihten na theih tawpa min ensan laite khan zanin ang chiah hian mittuia bual âtin ka lo awm tawh a; mahse, kha zan leh zanin a danglamna chu - khawvela aw mawi ber, ka thinlungin a thinlung a hnaih ber, englai pawha min hmangaih em em tu lo ni tawh thinin kha mi zan kha chuan ka mittui min hrukfaisak tlat a ni.

Read more »

MI MAKSAK UPA SIAMLIANA CHANCHIN I LA HRIAT NGAI LOH TUR CHU :

Ka pianna leh ka seilenna hmun, Behliangchhip (Zampui, Tripura) atanga KM 6 vel leka hla, Tripura-a kum 1911-a Kristianna pu luttu, Raja Hrangvunga Sailo-a’n Kristiante chenna atana a din, Tlangsang khua khu khaw lian lo tak ni mah se, Reng rama Kristianna nen erawh thuk takin an inzawm tlat a ni. Pu H.K. Dohnuna te, Pastor Zabiaka te, Tirhkoh Liangkhaia te, Saptlangvala (Watkin Roberts) te, Kâm Zaithiami (Sakhan Kami) te leh Zosapthara (Edwin Rowlands) te thlamuang leh ngampa taka tual an len ho tawhna hmun a nih vang hrim hrim pawh hian, Zofate thinlunga reh thei tawh lo tur ‘KHUA’ a ni. He khua hi tuna a chanchin kan sawi tur, hla phuah thiam hmingthang Upa Siamliana’n a hun tam zawk a hmanna khua chu a ni.

A tawi thei ang berin ka sawi dawn a, a chanchin kimchang aiin mi danglam leh maksak a nihna zawkah ka kawlawm tui ka seng hnem zawk dawn a ni. Siamliana hi kum 1894 khan Nalzawl (Mizoram)-ah a piang a; kum 4 mi lek a nih laiin a pa, Kairuma Theipuisum lal chuan a boralsa hlauh mai a. Tin, khuarel chuan hei mai hi duhtawk lovin 1902 khan Siamliana nu chu hmuh phak loh ramah a transfar-sak leh ta a. Fahrah Siamliana chu a u Thantluangi enkawlna hnuaiah a sei len a lo ngaih phah ta a ni.

Read more »

MITEN AN HMU VE LO - Laltanpuia Tochhawng

Nu chhul khawhar chhuahsana khawvel êng kan hmuh phat atang khan lâi hrui zai chah nâ leh tui sika bual avangin kan tap nghal a; hringnun kawng titoh tak zawh tan tura kailâwn rahbi hmasa berah bawh pawh bawkvak thei lova kan nau sawngnawi thut lai pawhin anchhe dawng HRINGNUN chuan a kut vawta min chelh a bâng chuang lo.

He anchhedawng Nun hrehawm tak pumpelh a, hringnun nuam zawk hmang thei tur hian ni tin-zan tin khawvel hi a buai phili thin a. Sakhuana hmanga rethei leh fahrah, chak lo leh ramtuileilo te chu thlamuan leh hnem hram hram an ni a; hun awl ninawm tiziaawm turin intihhlimna hrang hrang hmuhchhuah tumin Scientist rual an buai mup mup a; Social networking chi hrang hrang rawn thang chak tak takte hi ‘mihring hi amahin a tlei zo lo a ni’ ti chiangtu an ni.

Mahse, anchhedawng chu anchhedawng a ni a, pumpelhna kawng leh khân a awm lo! Mahse,.. mahse kan ti leh teh ang: Hringnun hian hlimna thuruk a nei a, chu chu scientist te thluak hmanga neih theih a ni lo va, mihring nuna Pathianin a dah lâwk dim diam a ni. Chu thil pakhat chu – mipa leh hmeichhe in-HMANGAIHNA hi a ni.

Read more »

LA THLA RAWH :

Professor chuan an zirlai tan nan, a kutah chuan rialno a chhunga tui awm chu a keng va va a. Pindan chhunga awm zawng zawngte hmuh tur chuan sang deuh takah a keng a. 

“He no rih zawng hi engzah nge a nih in rin?” tiin a zawt a.

“Gram 100... Gram 50... Gram 150” zirlai naupangte chuan an inrinsiak laih laih a.

“A nihna takah chuan kei pawh hian ka buk phawt loh chuan a rih zawng ka hre thei mai bik lo a ni. Mahse, ka zawhna zawka chu – he tui/rialno hi minit enge maw zah keng ta ila enge thleng ang? tih hi a ni,” professor chuan a ti a.

“Engmah,” naupang chuan an chhang a.

“Awle, a tha e. A nih leh darkar khat ka kenin enge thleng ve ang le?” 

“I kut chu a kham hlein ka ring..” naupang pakhat chuan fiah kek kawk tak hian a rawn chhang a.

“Chhanna dik a ni. Awle, a nih leh nilengin he tui/rialno hi keng ta ila enge ka chungah thleng ang?” professor chuan a zawt leh a.

“ I kut chu a khamin a mu nasa hle ang. Tin, i tihrawlte a kham tentun anga damdawiina kal i ngai hial mai thei a ni...” naupang chu an nui huk a...

Read more »