Michael Owen-a Football Zinkawng

Nula tam tak chuan a hmelthat vangin in hria pawh a ni mai thei. Mahse, football ngainatu leh a ngaihna hriate chuan he English hranghlui hlui lo tur hi, goal ban hnunga lên thlun a tih puar ngun em avanga hria an ni hlawmin ka ring.

Hmanni lawka Inbeihna phul hmun chhuahsan a, football mangthatu, Michael James Owen hi hrechiang lo kan la awm takin, thlalak nen ngei a football zinkawng tawi tein ka rawn tarlang ve zuai ange:

1. Footballer hranghlui,  Terry Owen –a fapa, Michael Owen hian tette atanga football khel tanin, Kum 13 mi a nihin School aiawhin football a khel ve a. Chak taka a ball khalh chu Brazilian keeper chuan a keah a rawn man chawt mai a. Mi tam takin a tlu mai tawh tura an ngaih lai chuan, penalty hlawh tura tluk lovin thei leh thei lovin a ding a, goal mawi tak a khung a ni. Khatih laia an manager, Terry Venables pawhin a chetdan chu a fak hle a ni.

2. Kum 16 mi lek niin, kum 1995-96 khan Liverpool Youth team tan a khel tanin, FA YOUTH CUP defending champion Manchester United lamah goal thum khungin Liverpool Youth team te chu Semi-final a hruai thleng a. Tin, Semifinal-a Crystal Palace nen an intum tumin first leg-ah hattrick siamin second leg-ah goal hnih a thun leh bawk a, 7-5 in a chakpui a ni. Tin final-ah goal khat rawn khung lehin Liverpool team chu 2-1 in a champion pui ta a ni.

3. Kum 17 a nihin Liverpool tan contract puitling a ziak.

4. Liverpool senior team tana a game hmasa bre chu May 1997 khan a khelin, an tumpui Winbledon lamah chuan goal a khung nghe nghe a ni.

5. Kum 1997-98 alo nih meuh chuan, kuhkum chu a rawn par chhuak ta! Michael Owen chuan EPL-ah goal 18 lai rawn khungin ‘Premier League Golden Boot’ a dawng nghe nghe a ni. Tin, ‘PFA Young Player of the Year’ atana thlan a niin, ‘PFA Player of the Year’ ah pawh 3-na a hauh nghe nghe a ni. A chungah hian Dennis Bergkamp leh Tony Adams chiah an awm a ni.

6. England National team tan February 1998 khan a game hmasa ber a khel a ni.

7. FIFA World Cup 1998 ah Ram tan a fehchhuak ve a, Argentina nen an inkhelh tuma a goal ropui tak chuan he striker naupang te hi khawvel dawhsanah a hlangkai ve ta a ni. Hemi tum hian Owen chu FIFA World Cup Best Young Player  atan thlan a ni nghe nghe a ni.

8. Owen hian Premier League Golden Boot chu kum 1997–98, 1998–99 khan a zawnin a dawng a, tin, BBC Sports Personality of the Year chu 1998 khan a dawng bawk a ni.

9. FA Cup 2001 final-ah Arsenal chu 2-1 a hnehin Liverpool chu FA cup a chawi pui a, heta goal 2 te hi ama thun ve ve an ni. Hemi kum hian Footballer te chawimawina sang tak, Ballon d'Or lawmman chu a dawng nghe nghe a ni.

10. Kum 2004 alo in her chhuah chuan, England fachuam duhlai chu Real Madrid chuan Spain lamah a phur thla ta daih mai!

11. Thiamna tinrengin run an remna hmunah chuan Michael Owen chu ava hnawng chiang kher mai! Kum 1 awrh a awm hnuah Owen chuan Real Madrid chu chhuahsanin England-ah bawk lo kir lehin, Newcastle United chu lawm takin a zawm a ni. A man hi ₤ 16.5 mtd lai niin, Newcastle Transfer Record a ni.

12. St.James Park-ah lehlam pawh inhliamna chuan Owen chu rawn umzuiin Magpies tan hian season 4 chhungin vawi 79 chiah a inlan thei a, mahse, goal 30 lai a khungsak leh tho a ni.

13. FIFA World Cup Germany 2006-ah England tan a fehchhuah leh a, mahse, German ramah pawh hliam chu ala umzui leh cheuva, German khelmualah hliam tuarin a rum leh ta a ni.

14. Kum 2009 alo inher meuh chuan, mi hrang rualin an hak thin Manchester United Jersey No.7 chu David Beckham-a thingrem hlui atangin a rawn phawrhchhuak leh a, a vawi hnih na'n kawr sen hain English khelmualah a rawn inlan leh.

15. Minit 90 a ni tawh a, Manchester United leh Manchester City chuan goal 3-3 ve ve an nei tawh a... Substitution thuthleng atanga lo lut, Michael Owen chuan hnehna goal rawn khungin 4-3 in United chu a rawn chakpui ta a ni.

16. Hliam chuan Old Trafford-ah pawh ala umzui zel avangin khelhna hun a chang thei mang lova. September 2012 khan Owen chuan Stoke City chu a club hnuhnung ber ni turin a zawm leh ta a ni.

17. March ni 19, 2013 a nih meuh chuan England pangpar chuan, chatuan a kir leh tawh lo turin, inbeihna tual zawl chu a mangtha ta a ni.  

Posted in: Football,Mizo,Remembrance