RAIRAHTE AN HAUSAKNA :

Turnipui chu vanah kaiin a chhingmit a len vel a,

Tlang leh mual hring hmunte chu an va mawi em!

Hrai tin ten a eng lawmin tual an chai a,

Chhim thlifim leh awihthiam huiva hramte chuan

A kuai ngei e lunglai vak velte khawvel chu.

Tuahpar rim leng velte fak hla zet zawng a ri a mawi teh e.

Chunnu leh zuapa duat hne kham zo lo hrai chu

A kûr nghian e tuangtuah an vullai chuan.

A sakhming a hrang lullo hrai dang tawnah,

A silhfen a hlim lo, a thinlung a lawm lo.

Run kaina chang lo hrai chan atan zawng a na lua e,

Hrai dang chûn tanga an changpan lai chuan.

A kut a thlir a, sum leh rohlu a awm lo;

A ke a thlir a, saruakin a lo awm si a maw?

A kâwng a tuai a, savun ni lovin tamnain a lo hreng a,

A ban a lek a, tisa a pan lua e tha a zâm lo.

A beng a dek a, hriatnate chuan bu an khuar ve si lo,

A thinlung a en a, hnemloh lung phu zawng a rang ngei e.

A chawlhna lungpui chungah chuan duhthu a sam a,

A lung a vak vel a, thlawkin a suangtuah ram chu a fang vel a.

Ngaiteh van atangin aw a rawn chhuak ta a:

“Ka fa I veiah I chhingmit len rawh,” tiin.

Ngaiteh a veiah chuan suangtuah neilo nausen chu suat turin an la a,

Ngaiteh, hmangaihtu a nei hauh lo! A zua a ni khandaih lektu chu!

Ngaiteh vana awm chuan, “Ka fa I ding thlir rawh,” tiin a hrilh a.

Ngaiteh a chhingmit chu ding lamah chuan a lên a,

Ngaiteh fu-ke kim, chhingmit kawngkhar inkhar si a ni,

A tiang chu a mitah; a kut chu dawhthlengah.

Hrethiamtu a nei lo, a tan zawng khawvel a thim ngei ang.

“Lalpa tinge ani saw I thlahthlam mai le,” tiin a auva.

Ngaiteh vana aw chuan, “Ka fa I hnuaiah I mit lên rawh,” a ti a.

Ngaiteh a mit chu lungpui hnuaiah chuan a lên a,

Chu hmun chu tuar chhuakte an zâlna hmun alo ni a.

An thlânah an sakhming a chuang lo, an zinkawng chanchin a awm lo.

An hringnun thawnthu a tawpna ruam chu ava tlawm em!

An tan zawng hriat rengna chu mumang ram mai a ni.

Ngaiteh, vana aw chuan, “I neih en rawh,” tiin a auva.

A taksa a en a, a zuapa zawng chawllo se a thlahlel ngei ang.

A chhingmit a dek a, mawi tinreng alo hmu a,

A neih a thlir a, hausa ava inti tak em!!!

A ban chu van ropui lamah a vawr a, a thingthi a,

“Lalpa ka neinungin ka va vannei em!” tiin fak hla a sa ta a.

Posted in: Hringnun Darthlalang,Mizo,Morale,Poetry