Ka muhil ka han thangharh hlawl mai chu mit nuai chat chat chungin sana ka’n ena,dar 7:30 A.M. a lo ni reng tawh maia,ka lo mutui hle a ni tih ka hre chhuak a.
Ka in phih fai zawh a,chaw te ka han eikham zawh hnu chuan chanchinbu chhiarin ka thu hahchawl a.Tih-
tur hran em em ka neih loh avangin ka mu zal mai mai a.Chutia ka muhil chuan mumang ka lo nei ni ngei tur a ni.Ka mumangah chuan kawtthler zau deuh maiah hian keimah chauh hian ka lo ding a.Nakinah chuan ka piah hlam 10(sawm) velah chuan mipui tawng nuaih nuaih hi ka hria a, chulam hawi chuan ka awmhmun ka’n siam
rem a, mipui ho chu an tawng nuaih nuaih avang chuan engnge an sawi pawh ka hre lova, engnge an tih pawh ka hre lo. Nakinah chuan Nu pakhat hian ring leng lawng hian, “Naupang kum tlinglo pawngsual hi kan ram mai ni lo,kan vengchhungah ringawt pawh hian a thleng zing tawh lutuk.Sorkar hian thil tisualtu hi hremna a na thei ang ber pe rawh se. Hnam dang mi lehnghalin hetiang taka kan hmeichhiatpui an ti bawrhbang hi kan pal zam mai mai dawn lo”a ti lawng lawng hi ka hria a.A bul vela mite ho chuan an AMEN hle a ni tih an thawm atang chuan a hriat hle a ni.
Chutia ka din reng lai chuan ka inher thuta, pan lam em em pawh neilo chuan ka kal ka kal a.Ka kal pah chuan nichina Nu pakhat thusawi kha ka rilruah a cham reng a.A ni ngawt tak mai,kan ramah hian hnam dang ho hi an huangtau ta deuh hlek a ni. Inhlawhfa, thirchhe zawng etc.te’n kan ramah an lo lut a. Keini Mizote lah kan taima nasa lo mai si. Hna thawk turin hnam dang kan chhawra, keini aiin an kut pawh a lo themthiam zawk si a. Anni chuan sum an thawkchhuak teuh teuh a,sum mai ni lovin, kan ram hi min neihsak daih an tum a ni. Keini lahin chu chu hre lovin, hnathawh ai chuan hlawhfa rawih tur an awm phawt chuan kan sum leh pai zawng zawng pawh kan ui lova, hausak phah lawihna tham hi chu kan tiral tawh ngei ang.
Hetiang kan nih reng chuan hnam dang te hian min chimral zo anga, ‘Ka ram’ tia chhal tur kan nei tawh lovanga, ‘Bawih’ dinhmuna dingin, “Bawih ni lo turin Krista Isuan min chhuahtir avangin…..” tih thu inziahna Bible zakzeh chunga talhfiakin min umzui hun a la thleng ngei ang.
Chutia ka inngaihtuah lai chuan, eng emaw ri hian ka ngaihtuahna atang chuan mi tiharh zawk a,ri lo chhuahna lam ni a ka hriat lam chu ka hawi vat a, mahse tumah ka hmu lo. Ka piah deuhah chuan Chawlhbuk a awma, chutah chuan ka thu hahchawla, thli thaw dawng zawng, kawngpui lam hnuchhawn zawng chuan ka thu a. Ruam leh phaizawl hringdup lam chu ka thlir a, thlifim a thaw heuh heuh reng bawka, han thut hahchawlh vel nan chuan duhthusam ang zan a ni hawt mai.
Chutia ka thut reng lai chuan ka chawlhnaah chuan pa 2(pahnih)hnathawk haw chu an rawn chawl ve a. Kan inbe lum lam lem hlei lova. Chawlh pah chuan meizukte siamin an ti ti bawrh bawrh a. Pakhat zawk chuan, “Hmanni khan Sorkar lam atangin tanpuina a lo thleng dawn tih thawmte kha ka lo hria a,engtinnge ni ta zel le? Hei,thla 2(hnih)ngawt chu a liam leh tawh chu a ni si a” a ti a. Pakhat chuan, “A!kei zawng tanpuina tih vel hi beisei enah pawh ka en tawh lo.An han sawi phul hlut nanga,a tak hmuh tur hi a awm leh ngai chuang lo.I sawi pawh chu,sawlai veng laili deuha car thar saw a ni pek ang chu”a ti a.Pakhat zawk chuan,”I sawi awmzia chu,’Mi buhzem a mi an mithmuh lai ngeiin an ruksak’I tihna a ni maw?Ava han mak ngai ve le.Inthiam lohna an nei miah lo a ni maw?”a ti a.Pakhat chuan,”Inthiam lohna tih te chu nei tehnang maw aw!inlak milen nan tak an hmanga,an chapopui ar zel mai mawle.A!keini tan zawng dinchhuahna kawng a kaw ve mawlh love.Nitin thlantui far zawih zawiha kan thawh pawhin,eikhawp chang chang kan hlawhchhuak a ni a,khua a var lo teh zawng a nih hi.Ngawi teh,hah te pawh a dam tawh bawka,zawi zawiin i kal ang hmiang,kan tlai lutuk ange”a ti a,an kal ta a.
An kal hnu chuan an thusawi chu ka ngaihtuahzui ta a,a dik ka ti hle mai.Kan tunlai khawvelah hian mi hausa leh retheite kar a hla hle mai.A hausate an hausa tual tuala,a retheite kan rethei tual tual zawng a nih hi.Hruaitu lian te’n an eirua,chu pawh tih tawh mah nakalaiin,an hnuaia mite lahin an pute hnung zuiin eiruk
tur zawngin an lo hmanhlel ve bawk si nen,’Sial rangin Sial rang a hring ‘tih zawng zawng kan neih zo a nih hi.
Chutia ka inngaihtuah lai chuan,au rual dual dual thawm chuan min tiharh zawk mai a,khawilam nge tih hriat tumin ka mit leh beng ka len ruai a.Ka hmuh mai tak silohvah chuan ri lo chhuahna lam pan chuan ka kal ta a.Ka kal lama ka kalna kawngah bawk chuan ka let phei leh a,vei lamah chuan ka penga,ka kal zela,ka hma deuh lawk kawtthler lunlai takah chuan,mi an lo pungkhawm teuh mai a.Eng an ti chu ni maw?ti rilru chung chuan tlem ka han kal hnai leh hret a.
Mit tlin tawk vela tang chuan ka thlir ta reng a.Mipa leh hmeichhia inchei nalh tak tak,cheng sang chuang man rapbet tih hriat ngawih ngawih te,chutah School naupangte pawh ka hmu ta a.Vengchhung tifaiin an hnatlang em mawn chu aw!tiin ka rilru te te chuan ka lo fakin,nihlawhthlak ka lo ti hle mai a.Hlim taka nui sang chung chuan,an lamah chuan ngun leh zual hian ka mit leh beng ka chhi a.Chutah an rawn au rual ta that that chuan min ti phu zawk thei hial mai.
Tun maia ka lo rindan leh ka thil hriat inpersan lutuk chu ka nui chhuak hial a.Vengchhung tifaia hnatlang an lo ni awkawng lo,nalh tak taka incheite kha Zirtirtu an ni a,an School naupangte nen kawng an lo zawh chu lo niin.Chutia Zirnain khar hial khawpa an nawrhna chhan chu eng tak ni ang maw aw!tia ka lo ngaihtuahlai chuan,an zinga pakhat an hruaitu deuh ber niawm chuan,”Kan hlawh hi tihsan ve ni rawh se”a ti a.Midang chuan an lo zawm dual dual a.Kei misual lah ta pek hian ka la hrethiam chuang lo.Ngatinge Sorkar pawh hian an thawh phua hlawh an pek loh le,tiin ka lo ngaihtuah a.
Chutia ka in ngaihtuahlai chuan,mi pakhat hian ka hnungah hian mi rawn beng deuh thak a,ka harh zawk mai a.Ka han hawilet chuan Vengthlang lama ka thianpa a lo ni reng maia.Kan han in chibaia,thu sepsel te te kan sawi hnu chuan,”Saw,engnge an tih?”a ti a.Kei chuan ka lo ngaihtuah mek chu ka han hrilh a.Ka thianpa chuan,”Ka thian leh!i va han chhah tak,sawng hote chu an hlawh a sang asin.Lungawi ve mai thin tur hi a nia,duhtawk chin hi an nei dawn lo a nih hi.Tisawn,Zirnain khar khawpin kawng an han zawh ania leh!duham hlawm leh lutuk”a ti ta hrep mai a.Thu dang sawia kan han rik hlut hnu chuan min kalsan ta a.
Ka thianpa thusawi chuan ka rilru a tikal thui hle mai a.Engnge ka tih dawn pawh hre lo chuan ka thutna atang chuan ka tho thut a,ka hmazawnah chuan chak em em mai hian ka kal a;ka hmanhmawh em avang chuan ka tlu lek lek thin a.Ka kal zel a,nichin lawka ka thil hriatte leh a hmaa ka thil tawn te avang chuan ngaihtuahna mumal pawh ka nei hlei thei lo va.
Chutia ka kal pah chuan,thawm chi hrang hrang pawh ka hre thei a.Thenkhat chu,thinrim tih hriat taka tawng lawng lawng te,insual thawm niawm tak tak te,a!a tam mai;thawm chi hrang hrang ka hria a.Mahse,a engamah chu ka belchiang ngam tawh lo,ti ila ka duh tawh lo a ni ber ang chu!Hawisawn hauh lo chuan hma lam chu ka pan ding char char ringawt mai a ni.
Ka thil tawn teh hrep avang chuan ka hmalama thil awm pawh chu ka lo hre chang lo va;engmah pawh ka hmu fiah thei tawh hek lo.Chutah ri chawrh hi ka hria a,a bak chu ka hre zui tawh lo.
Ka han harh meuh chuan,ni hian ka awmna zawn chu a rawn chhun a,ka han harhchian hnu chuan khumah ka lo mu reng a ni tih ka hrechhuak a.A hma lawka ka awmdan chu ka ngaihtuahlet leh a,ka pangte chu ka han dek vel a;engmah insawiselna ka nei lo.Tichuan,a hma lawka thil thlengte chu ka mumang mai a ni tih ka hrechhuak ta a,ka hlim leh ta em em mai a ni.
Mumang hrehawm tak atanga harhchhuah chu ‘hnara hlit phawi’ang huai a ni thin tih chu kan hre theuh awm e.Tichuan,keipawh chu mangchhia atanga harh chhuakin rilru zangkhai takin inbual turin bathroom lam chu ka pan ta a.
Ka inbual zawh chuan thingpui in pahin ka mumang chu ka ngaihtuah zui mai mai a.Ka thil tawn hrehawm leh hahthlak tak tak te chu mumang mai an ni tih ka han ngaihtuah phei chuan ka nui chhuak hial a.
Thil dang tih tur tehchiam a awm loh avangin engto neilo takin T.V. chu ka en a.Chutah chuan News an lo puang a,tunlai thil thleng an rawn puan lai chuan,hriatchhuah fo atana ka duh tawh loh,ka lo theihnghilh hmin lek lek tawh ka mumang chu ka hrechhuak zawk mai a.A va han rapthlak ngai em! Ka mumang te kha chuan ‘a ne pawh a ek lovang’ tih tur a ni.
News chu darkar 1(khat) dawn an puanga, chumi chhung chuan chanchin tha lam hriattur pakhatmah zu awm lova le!
Ka bing chuk chuka, chet sawn zai pawh ka rel lawk theilo.Kan ram dinhmun lo hniam ta lutuk chuan min deng na ematin ni.Thil thleng zawng zawng ka sawi seng lo.
Kristian ram kan inti a,mahse,kan nun dan leh kan khawsa ziaah Isua ringtu kan nihna a lang silo.Bible zak zeh chunga eiru te,Pulpit chum dum dum a mi Nu it ta tlat te,keini miretheite tan chuan ti a,retheihna chapopuite kan va tam ta em! Biakin leh a chhehvelah chuan mi zahawm tak,KTP ah te pawh active leh hnatlan nikhua pawha tlawmngai thei tak,mipa te pawhin an fiam that ngam mang loh te pawh khawilai kawmkar deuhah chuan dawl zawr taka zawr leh si te kan awm ta nual mai.
Ani hi chu a thiamin lar hi a phu tak tak ania tiin an pak huama,thla 2(hnih) 1(khat) a liama sex video larpui ta zawk te an awm ta zel mai.
Ka sawi senglo ka tih tawh kha.Hetiang taka kan ram lo tlu chhe ta hi ngaihthahin kan enliam mai mai dawn emni?Nge ni a khawvel chu a her hera her tirin kan inti thangtlawm zawk dawn?
Chhiartu duh tak,kei mimawl mai pawhin kan ram hi hmangaih nachang ka hria anih chuan,nang phei chuan i hmangaihin siam tha tura tan i lak ngei ka ring a ni.
Chuvangin kan ram tung ding leh tur hian nang leh kei hian mawhphurhna kan kova kan nghah a ngai a ni.Hei lo hi ram dang tia sawi tur kan nei lo.He Mizoram zim tak hi kan ram neihchhun liau liau a nih avangin,hnam dang nuihzat tur leh zuam tawk leka a thangtlawm i phallo a nih chuan,ram leh hnam hmangaihna rilru pua rawn pen chhuak turin Zoram hian a au a che.Mahse,ram leh hnam hmangaihna rilru pu lo,hmingthat leh mahni tanghma hai nana lo zawm ve tum che an awm vaih chuan,chumi hnen atang ngei chuan i hna i thawk tan dawn nia.
Muan a hun tawh lo.Thian chhan thih ngam Zofa chhulchuak i nih ngai chun,Zoram hnukchat tur chhanchhuak turin damdawi tha ber ber kengin Zoram Doctor,rawn pen chhuak tawh rawh le.
Vanlalthapuii
3rd December,2009
(Thursday)
4:56 p.m. Kawrthah, Mizoram
18:00
Unknown
Like a swarm of bees
