HEMI PIAHAH HIAN ENGE AWM?

Dam lo chuan damdawiin pindan atanga a chhuak pah chuan amah enkawltu daktawr lam chu rawn hawi kir lehin, “Ka pu thih hi ka hlau a ni. He nun piah lamah hian enge awm I hria em? E

nge thleng ang?” a ti a. Doctor chuan a hriat bik loh thu alo sawi a. “I hre lova maw?” dam lo chuan mak tih hmel deuh hian a chhang vat a.
“Nang Kristian pa hian he nun piah lama thil thleng tur leh awm tur hi I hre lo a maw?” a ti ta a.

Daktawr chuan kawngka chu a kik kauh kauh a, chu veleh bang lehlamah chuan thawm a rawn chhuak ta a. Ui pakhat hi a rawn bauh vak vak a.

Daktawr chuan kawngka chu a hawng a, ui pa pakhat hi an awmna pindanah chuan bauh tuar tuar chungin a rawn tlan lut ta a. Ui chuan a pu a hmuh chuan a bauh lai chu a tawp a, a ke bulah chuan a thu a, a pu chu a liak a.

Daktawr chuan a damlo enkawl lai darah chuan dawmin heti hian a sawi ta a: “Tuna ka uipa chet dan kha i lo hmu em? Ani hi he pindanah hian tun hmain vawi khat mah a la kal ngai lo. A chhungah hian enge awm tih pawh a hre lo. Mahse, a hriat awmchhun chu, ‘he pindanah hian a pu ka awm a ni’ tih chauh hi a ni. Chuvangchuan he pindanah hian hlauhna nei miah lovin a rawn tlan lut ta a ni.”

“He nun piah lama thil awm tur leh thil lo thleng tur chanchin hi kei chuan engvak mah hriat ka nei bik lo. Mahse, he nun piah lamah hian ka Pathian chu a awm a ni tih ka chiang a, chu chu ka tan chuan a tawk hle a ni. Chu kawngka a inhawn hunah chuan kei pawh hlauh nei miah lovin ka lut ve anga, ka uipa ang bawk hian thlamuang takin ka Pu kei bulah chuan ka bawk ve tawh ang.” A ti ta a.

 

Read more »

MI ROPUI CHU...

 Mite fak a phut ngai lova; mi fak erawh a kham ngai lo.
A mangang ngailo a ni lo; mahse a zam ve ngai lo.
A tap ngai lo a ni lo; mahse a bang leh thuai thin.
A tlu ve ngailo a ni lo; mahse a tlu rei ngai lo.

Riltamin a awm fova; mahse a vui ngai lo.

A thawmhnawm inbelin atan awmzia a nei ve ngai lova,
A thinlung chhunga awm chu a ropui em avangin.
Mi khawsak danin a nun a tibuai ve ngai lova,
Awhna thlarau ten an chim ngam ngai lo.
A lian lova, mahse an hmu te ngai lo.

Read more »

2018 Russia World Cup Stadium (In Picture) :

FIFA chuan Russia khawpui te zinga FIFA World Cup 2018 host tu tur khawpui 11 a thlangchhuak tawh anih kha. Tournament hi stadium 12 a khelh tur a ni dawn a, Moscow chuan stadium 2 thawhin a bak zawng ten 1 theuh an thawh dawn a ni.

India rama kan stadium chhuan ve em em, Salt Lake stadium (Kolkata) te lakah chuan la ropui feng feng tak an ni a, entu mipui leng hnem viau lo hlawm mahse a changkangin a 'class' a sang khawp mai. Kan Admin Hriatpuia hian an chanchin han sawi zawk se chu kei ai chuan a sawi thiam ngeiin ka ring. Vawkin takngial pawh sa thiam lo ta chu Russian architect leh engineer pachal hovin duhthusama budget kang theilo hmanga an sak meuh zawng han comment vak ngaihna ka hre meuh lo a ni. Chuvangin an thlalak chauh kan rawn tarlang ange :

1. Rubin Kazan stadium chhuanvawr hi mi 45,000 lenna a ni.
 

2. Kaliningard khawpuia sak tur Kaliningard Stadium-ah hian mipui 45,015 vel an leng dawn a, Russian 1st division clu, FC Baltika Kaliningrad khelmual tur a ni.


3. Moscow khawpuia awm, Spartak Stadium hi 'multi-purpose stadium' a ni a, kum 2010 atanga sak tan niin 2012 ah an sa zo a ni. Mipui 35,000 leng tura duan nimahse, mi 42,000 leng tura tih len a ni. Russian club lar tak, FC Spartak Moscow home ground a ni.


4. Nizhny Novgorod-a sak tur Nizhny Novgorod Stadium  hi mipui 44,899 leng thei tura duan a ni. Russian club, FC Volga Nizhny Novgorod home ground tur a ni.


5. Rostov-on-don a sak tur Rostov-on-Don Stadium ah mipui 43,702 vel an leng ang. Russian 1st div. club, FC Rostov home ground tur a ni.


6. St. Petersburg Stadium hi 2018-ah chuan mipui 60,000 vel lenna stadium a ni tawh ang.


7. Samara-a sak tur, Samara Stadium ah hian mipui 44918 vel an leng dawn a, khawpui pawn deuh hleka sak tum a ni a, boruak pawh a nuam hle dawn a ni. A sak man hi a tlawm dawn lo hle mai a, $320 million vel sen a ngai dawn a ni. He stadium nuam tak ni mai tur hi FC Krylia Sovetov Samara home ground tur a ni.


8. Saransak-a sak tur, Yubileyniy Stadium hi a mawi danglam khawp maia, mipui 45,015 vel an leng ang. FC Mordovia Saransk home ground tur a ni.


9. Sochi Olympic Park a sak tur, Fisht Olympic Stadium hi 2014 Winter Olympics leh Paralympics thlenna tur a ni a, he stadium hi mikhual te hip ber tura ngaih a ni. Olympic village atanga hnaite a sak tur hi Russia-a tlang hmingthang 'Mount Fisht' hming chawia a hming hi phuah a ni. Mipui 47,656 chuang lenna tur hi Russian National Football Team te khelmual leh training ground tur a ni.


10. Russia-a football stadium lian ber, Luzhniki Stadium  hi Moscow khawpuia awm niin, Russian football history-ah chuan a hmingthang ber pawl a ni. July 31, 1956 a hawn niin mipui 89,318 vel an leng a ni. He stadium hi kan hriat awlsam theihna ber turah chuan, ' 1982 Luzniki Disaster' thlenna hmun kha a ni.


11. Volgograd-a awm, Volgograd Stadium hi 'multi-purpose stadium' niin tunah hian mipui 32,120 vel an lenga, mahse, World Cup hma ngeia mipui 45,015 leng thei tura tihlen tum a ni. SC Rotor Volgograd home ground a ni.


12. Yekaterinburg-a awm, Central Stadium hi 'milti-purpose' stadium niin, kum 1957 daih tawha an sak kha a ni. Mipui 44,130 chuang lenna hi FC Ural Sverdlovsk Oblast in home ground-a an hman a ni.

 

source : guardian.co.in ; sports keeda, wikipedia.org

Read more »

David Beckham-a Football Zinkawng :

Tun tum chu football khawvela ka mi ngaihsan em em mai, David Beckham a zinkawng, thlalak nen kan rawn chhawpchhuak ve ange.  Chhiartute mit a tlun zawh ngei ka beisei e -

1992 (Manchester United) – Manchester United Debut :

FA YOUTH CUP ah Gary & Phil Neville, Paul Scholes, Nickey Butt te nen khel hovin final-a Crystal Palace hnehin an champion. Hemi tuma United youth team te hi ‘ Greatest generation of Manchester United’ anti hial a ni. Hemi kum vek, September thlaah Leaque Cup a Brighton nen an inkhelh tumin substitute ah awmin Manchester United senior team tan a vawikhat nan a inlan ve a ni.

Read more »

‘Tripura Mizo Footballer/Coach of the Year’ Thlan A Ni :

Rengpui ram(Tripura)-ah mahni ram tih tur ram zimte, arhmai tiah vel lek an nei ve a; mihring lah chhiar har tawk chauha tlem, uihum zah tak meuh meuh an awm vea. Mahse an ram, thlahtute nasa taka an lo zam tawhna thin ‘Zampui Tlang’ a zam velo Mizo rual awm khawmte ram luah hi Tripura state chuan a ram chhunga hmun nuam berah chhalin, ‘Paradise Valley of Tripura’ ti hialin a ko a ni.

RENGZO FOOTBALL CHANCHIN TLANGPUITE :
Sailo lalten khua an dinna he tlangdungah hian Mizo ten game kan ngainat ber, FOOTBALL hi hun rei tawh tak atang khan an lo khel ve daih tawh a, hriat erawh an hlawh em em lo thung.  Pipute Hmawngdawr (Kailashahar) leh Phawtikuli (Dharmanagar) vela lehkha zir hmasa ten 1925-1930 vel khan he infiamna hi Jampui tlangdungah rawn hawn vein tualzawl zau laiah Serpui sawhdup leh Pawnchhe thuikhawmin an lo inkhel ve tawh a ni.

Aitlaia, Behliangchhip khua leh a thiante, Hmawngdawra zuk bazar-in vaiho inkhel an hmu a, an cho ta riau mai a. Inkhelh puiah an sawm ta a. Aitlaia chuan, "Keiin kawng ka sial anga, nangnin ball kha rawn chhir phei zel ang che u," a ti a. Vaiho chu a nam tlu phei zela. Goal khat thunin an hneh ta a ni. Aitlaia leh a thiante hi 1930 bawr vel khan Kailashahar phaiah an lo Champion daih tawh a ni!...

Zampui tlanga khelmual hmasa ber ni turin Vanghmun khuaah 1930 khan thirdeng Neihthanga Bawngtuthlawh pakhat neihchhun hmangin khelmual an lai zo thak bawk a ni.

Tin, June ni 6, 1947-ah Jampui Football Association din a nia, tunah erawh pawl nung ni tawh lo mahse din thar leh tura hmalakna neih mek a ni.

Kum 1963 khan an rawn sawm angin Mizoram Olympic-a han khel turin Zampui XI an han thawk chho va ; programme an lo thulh leh tak avangin Pu Lalmawia MLA bial Team, ‘Aizawl XI’ nen an inkhela, 2-1 in Zampui XI hi an chak nghe nghe a ni.

1940’s chho vel atang khan Zampui-ah hian Football tournament mumal taka khelh chhoh tan a ni a, kum 1990 khan Tripura Group YMA chuan he tournament hi lain, kumtin donate tu tur zawngin a ‘organised’ thin a ni. Darlong phai ruam atangte leh Mamit District (Hachhek tlang dung) lam atangin - Kawrthah, Zawlnuam, Tuidam, Bawrai, Bungthuam, Kanhmun, etc. ten he tournament hi an rawn khelhpui ve thin a ni.
Kum 2009 atang khan Pu Robert Romawia, Aizawl FC President chuan apa hriatreng nan ‘Thanthuama Memorial Trophy’ tih hming chawiin he YMA tournament hi a sponsor a, sum lamah pawh nasa takin hmasawnna hmuh tur a awm phah ta a ni. Kumin, 2012 hian Behliangchhip Branch YMA te chu CHAMPION niin Vanghmun Branch YMA te chu pahnihna an ni thung. Finalist te hian trophy, pawisa fai leh jersey te an dawng a ni.

Hetiang taka football ngaisang si hi Zampui tlang chhuak footballer lar tak hriat tur an vang hle mai a, hei vang hian Zampui thalai football hmangaihtu pawl te chu intel khawmin Zampui/Jampui Football Promoter Group (Jampui Football) in dinin Facebook lamah nen tan nasa takin an la tan mek a ni. Tun kum hian he Group hian Tripura ram chhunga Mizo football khel thinte chawh phurnan leh a ram mipui te zinga football in ngaihhlut a hlawh leh zual theih nan tiin lawmman/award  a sem tan ve ta a ni.

Jampui Football Group, ‘Footballer/Coach of the Year’ hi Behliangchhip khuaah November ni 8, 2012 khan sem niin, trophy mawi tak leh certificate te hlan an ni.

TRIPURA MIZO FOOTBALLER OF THE YEAR : LALRUATFELA (TRIPURA XI & LALBAHADUR FC Goalkeeper)

Agartala khawpuia i kal chuan Rickshawpu emaw eichawp dawr nghaktu emaw pawh i hmuh chuan ‘Ruatfela’ hi a hriat leh hriat loh i zawt chhin dawn nia! Tripura football fans te tan chuan hriat loh rual a ni lo.

Tripura chanchinbu lar ber ber, ‘Tripura Times’ leh ‘Dhainik Sambad’ te vawi duailo lo tial thin tawhtu Tv. Lalruafela hi kum 1984 khan Pu Rokima leh Pi Lalrinsangi te fapa neihchhun leh upa ber ni turin Hmunpui khuaah alo piang a. Naupang zakzum leh thian pawl nuam ti tak a ni. Football thlipuiin Zampui tlangdung a nuai lai vel boruaka seilian a nih avangin football thlarau chuan a tette atangin a chenchilh tan a ni. Tin, a pa hian inkhelh lamah hian a tuipui hle a, an veng senior team a kaichhoh hlim pawhin a pa hian an goal bulah lo dinpuiin, mite hriat ngei tur leh a fapa fuihna ni pah fawmin, “Ka fapa hian A.K. 47 mu lo chu a chhuah lovang,” tiin a lo au lauh lauh thin a ni.

Ram Pawn Lamah :
Kum 2001 alo inher chhuah meuh chuan, mahni chauh pawha field kopang vawm pera ball man zir peih, tlangval taima tak chuan Tripura aiawh a National U-17 Football Championship, West Bengal-a khel turin sawmna a hmu ta a, hemi tum hian a chetha hle ni tur a ni, Agartala 1^st Div. League Club te hnen atang pawhin sawmna a dawng nasa hle a ni.

Hemi hnu hian a club khelhna, Tribini Sangha (2^nd Div.) chu chhuahsanin 1^st Div team, Birendra Club  chu a zawm ta a ni. Kum 2009 ah Forward Club chuan contract sign puiin he hmunah hian a hming a chher tan ta a ni. Forward hian captain-ah hmangin hemi kuma League champion an nih theihna chhan pawh hi amah vang liau liau a ni ti ila kan sawi sualin ka ring lo.

Kum 2012 may thla atang khan Tripura senior team tan rawn khel chho va tanin, Santosh Trophy, Cuttack, Orissa a khelhah pawh khan Tripura XI 1^st goalkeeper a ni nghe nghe a ni. Tin, tuna kum 28-na hmang mek   hian tun July thlaa Tripura XI leh Bangladesh 1^st div. club, Mohammedan Club nena an inkhelh tum pawh khan a chetha hle a, Bangladesh 1^st div. club te hnen atang pawhin season thar leh tur atana sawmna a dawng nasa tawh hle a ni. Tunah hian Lalruatfela hi Agartala club tha, Lalbahadur FC tan a khel mek a ni.

TRIPURA MIZO COACH OF THE YEAR : LALTHANPUIA (BEHLIANGCHHIP HEAD COACH)

Pu Lalthanpuia hi Pu Sanghnuna leh Pi Rengchuangin te fapa upa ber ni turin kum 1975 khan Behliangchhip khuaah alo piang a. Behliangchhip leh Zampui XI player tha ni thin, ball tauh thiam em em mai, ‘Lu Mawia’ ti hiala an koh thin, Sanghnuna fapa hi thlahtute atanga inkhel thiam chhungkua atanga seilian a nih angin, tette atangin he infiamna hian a rilru a luah hneh hle a ni.

Pu Lalthanpuia hi Zampui football thachhoh zelna tura a sulsutu leh Rengrama zofate zinga football thlarau ti nungtu a ni ti ila kan sawi sual tamin a rinawm loh. Kum 15 pawh a tlin hmain an veng senior team a hlan chhoh niin, a inkhelh hi hmuhnawm tilo an vang hlein a rinawm.

Kum 1996 khan Tripura aiawhin Agartala khawpuia khelh, National Football Championship-ah a khel ve a, hemi tum hian a hming a chher nasa hle a ni. Tin, age level-ah pawh Tripura U-19 tan vawi duai lo a lo fehchhuah ve tawh thin a ni. Behliangchhip 1^st div. team captain hlui hi Zampui-a football khel thinte zingah chuan ball pet thiam ber pawl a ni ti ila kan sawi sualin ka ring lo.

Coaching lamah hnuhma ropui tak hnutchhiah tur nei lo mahse, inkhel thiam leh tuimi, inkhel zir peihmi a nih avang hian mite ngaihsan a hlawh thin a ni. Jampui Higher Secondary School Physical Instructor ni mek hian S.M. Cup leh State level-a age level football competition hrang hrang-ah Zampui team te vawi duai lo a lo fehchhuahpui  tawh thin a ni.
Kum 2011 atang khan Behliangchhip 1^st div. team coach atan ruat a ni a, an ruat kum hian Behliangchhip team te chu ‘Thathuama Royte Memorial Trophy’-ah semi-final thlen puiin, a kumleh 2012-ah Champion nomawi a chawipui bawk a ni. Tun kum tournament-a pool-a tla tawha ngaih, Behliangchhip team te formation danglam tak (3-2-2-3) hmanga rawn champion puitu hian ngaihsan a hlawh hle a ni.

He lawmman/award buatsaihtu pawl, Zampui Football Promoter Group hian Mizoram lam leh Zampui players ten inpawhna tha zawk an neih theihna turin hmalak an tum mek a, MPL leh league sang zawk  Club lama khel thei tur players talent nei tha takte zawnchhuah hna an thawk dawn bawk a ni.    

Read more »

I MAWI MANGE SAWISELBO :

Enteh saw a her siau ve Lengtinkhumi chu!
A bahsam lungman tam iangin a tle sir siar e,
Turnipui pawhin a chhingmit a khar tak khi!

A sakhmel thlang hartu luan iang,
A chhingmit chhum ropui ianga paw no ruai chu,
Zan lalnu pawhin thlir chakin a hrai te kalsanin,
Van zawlah a chhingmit a rawn len leh tak khi!
Aw I mawi mange SAWISELBO!

Hmelthatna lalnu in mal a sawm bik em ni?
A mit khapte chuan tlangte chu lawm avangin a sawi nghing a,
Luipui luang lai te chu a chawlhtir a;
A aw rawl thangkhawk ngaihthlak chakin,
Tlang leh mualte chu an inbuan a,
Van zawla mupui leng pawhin chaw zawn zai a rel thei lo.
A hmui Rose par ianga sen te chuan suihlung an dum ngei e,
Aw I mawi mange SAWISELBO!

Read more »

ZOHNAHTHLAK LANU NANG NGEI KA THLANG BER CHE :

Laichhuat sen chhirin thlang kawrvai lanu a rawn her siau va,
A mal mum nalh zet leh a kethiah vur anga varte,
A heh hriatloh ramdai rose par tluk zeta sen ho hiam te,
A mit meng Bengal tuipui ianga paw no riai mai te,
A bahsam lung mantam ianga tle sir siar te,
A hnar tum nei rana kawh zum va te chu an mawi ngei e.
Tu val hian nge maw hnawl phal ang che le hmeltha Lalnu?

Enteh saw dawhsan ropui kanin laichhuat a rawn chhir e,
Silhfen ropui sinin Thlang Sappui lanu ngei mai chu.
Duhawmna Pathiannu-in mal a sawm chu,
A kimtlang a mawi hluan e val lung mawla tan,
A sakhming a mawi ngei e khuavel chhingtu meuh chu.
A sakhmel a mawi ngei e Arab rimrui tinreng nen,
Tu val hian nge maw hnawl phal ang che le hmelthatna Lalnu?

Enteh u saw leika a rawn kai e Zachhingpuii chuan,
A hrei humna kut thap hrip-hrep te,
A bahsam lazai chhemi ianga in thlah pheng nghian te saw;
A heh vaihlo tur te lung muang taka an bikna hmun chu,
A chawn-ban leh sakhmel thlawhhma rumrut hmaa chul tawh hnu te,
Turnipui hrang hnuaiah Lengi chuan
Tuahthing phurin an run a kai leh tak saw.

Ami lengten an sel em ni?
Sel rawh se keizawng Zohnahthlak lanu nang ngei ka thlang ber che.
I chawn-ban a no lo an ti maw?
No suh mahsela Zohnahthlak lanu nang ngei ka thlang ber che.
I bahsamin Thlang Kawrvai lanu a chhing lo anti maw?
Chhing suh mahsela Zohnahthlak lanu nang ngei ka thlang ber che.
I hming koh a mawi lo an ti maw?
Mawi suh mahsela Zohnahthlak lanu nang ngei ka thlang ber che.

Dawn lung ruk lairil hre hawt si lo hian an iai thin che maw?
 Iai rawh se keizawng ka thlang ber e.
Zohnahthlak lanu nang ngei ka thlang ber che.

Read more »

ZAN LAM TAWNGTAINA :

Zanmu ka chhin dawn hian Nang chuan ka thla veng la,
I thinurna mei chhemalhtu ni thin mah ila,
I lei tawh kut tehi ti boral lo la,
I ram dinnan Nangin hmang ang che.
Thunun loh Lei hi ti boral lo la,
I hming faktu atan Nangin hmang leh ang che.
Pen bosan thintu che, ka Ke te hi ti boral lo la,
Kalvari tlang kawng chu Nangin kawhhmuh zawk ang che.

Ka nunna hi Lalpa I kutah a awm a,

Ani, I kutah liau liauva awm a ni.
Nang chuan I Lalthutthleng ropui atangin ka tan ro i rel thin a,
Ka nunna hi ka thu a ni si lo.
I zahngaihna hi ka damna chhan chu a ni.

I tawngkam khat chauh pawh hi ka tan chuan Chatuan hlimna a ni a,

"I awm ani," tih ka hriatna hi ka damna chhan chu a ni.

Read more »

ISUA'N A HNEH ZO TAWH :

I duhna leh chakna te'n an hruai kawi thin che em?
I phak loh ram chu I awmna tur niin I in hre ngai em?
I khua a harin I mangang fo thin em?
I chak lohna te chuan an ti lungngai thin che em?
I duhthusam thil tha tih te chu harsa I ti thin em?
I hmangaih, khawvel thlah chu harsa I ti ve thin em?
I nunah chawlhna hun a awm lo thin em?

 

Isua'n a hneh zo tawh; Ama'n a hruai tawh zawk ang che.
Isua'n a hneh zo tawh; Ama'n I phak loh ramah chuan a hruai kai ang che.
Isua'n a hneh zo tawh; Ama'n a thlamuan tawh zawk ang che.
Isua'n a hneh zo tawh; Ama chakna I ring tawh dawn nia.
Isua'n a hneh zo tawh; Ani chuan mi felah a ruat ta che.
Isua'n a hneh zo tawh; Ani chuan A hnenah a hip tawh zawk ang che.
Isua'n a hneh zo tawh; Amahah chuan chawl hahdam tawh ang che.

Read more »

KA DIARY MANTO TAK MAI CHU, EPISODE-IV (ZIRA IS BACK…)

            (To be continue chhunzawmna…)                       

Damdawi mum lian, kan thianpa Zira chanchin hi kan sawi ngun ta malh malh khawp mai. Fiamthu thawh thiam ni lem lo mahse,  amah hmanga fiamthu thawh thiam erawh an thahnem khawp mai. A ni hi sawi leh sawi hnu, mi danglam tak hi a ni ve hrim hrim a, a kephah chhah lutuk te hi kan awmna tlangdungah chuan a hmingthan pui a ni. A ke hi an chhah mai mai khawp a(h), a ke a lei an rah te hian a ke zungtang te hian lei hi an tawk pha ngai ve meuh lova, an lo kawh ve mai mai thin a ni. A chhah mai ni lovin a chang tel leh nghal a, tum khat pawh naupang hovin Van Dame a bek khik (back kick) nat zia an lo sawi laih laih a, an zinga pakhat chuan, “Au Zira ke phei chu nei se aw…” a lo ti pek a ni awm e. Inkhelhnaah te hian ball boot a bun loh tum a nih chuan a lama tan kan inchuh laih laih thin a nih tak kha maw.

‘KAN THIANPA ZIRA’N PALAI A TIR VE…’

“Satel pawh a vah a vah chuan a tawp a tawpah chuan a tum ram a thleng nge nge thin,” an tih ang deuh khan, tum khat chu thianpa Zira chuan kan veng nula hmeltha, Zopuii hnena palai tirh a rilruk ve ta tlat mai le...

Read more »

KA LO TISUAL A NI...

Vawiin ka class kal tur chu ka in uluk ve khawp asin. Ka hmaiah cream kan hnawih a, ka zakhnuaiah Very Very Sexy body spray ngei mai chu kan phuh that that bawk a. Uluk takin darthlalang hlui tawh zet maiah chuan hmeltha ber niawm tak chuan kan in thlek vawng vawng a. Mahse, ka kawr te hi an lo va hlui tawh si em... Ka kekawr pawh hi kum hnih lai ka hak tawh a ni bawk a, a rawng ber pawh a hriat hleih theih tawh lo anih ber mai hi. Ka sam kan en leh a, Steel wool leh nawhfe inkara piang ni awm vela mawiin alo pheng no nghan mai a. Chutah, Ka ke kan han en thla leh a, pheikhawk hlui tawh tak, tet tuau mai hi alo in thawlh run mai a.

Tlangval dangte nalh theih zia leh neihnun bik zia ka ngaihtuah a, ka zak ngawih ngawih a ni ber.

Read more »

Ka Diary Manto Tak Mai Chu : Episode – III (Zira’n Setana a bum em ni?, Wanted the Bliss leh a dangte)

Thuhma: ‘Khawvel’ an tih ah hian midang te angin rangkachak thirfian pianpui ve lo mah ila, rangkachak aia hlu zawk thil dang tam tak ka pianpui ve ani tih tun hnuah hian ka chharchhuak ta mawlh mawlh mai.  Thian dangdai leh maksak tak tak te, vanneihna vanduaithlak tak tak te, vanduaina vanneihthlak tak tak te, tlakranna hlimawm  tak tak te, tuarna hlimawm deuh deuh te, mawl leh atna zahpuiawm tak tak, mahse, tun hnua vawi tam min ti nui thin tu ni si te neitu leh pianchhuahpuitu ka nih vang hrim hrim pawh hian Ram ni tla senlo a roreltu lalthutthleng luahtu aia ka nun hi a hlimawm leh nawm loh bikna ka hre ngai lo.

Read more »

Ka Diary Manto Tak Mai Chu, Episode – II: (very very Sexy leh a dangte)

A thawhkhatna ah Computer chungchang te, Kawi lawh chungchang te leh Phai a zin chungchang te kan lo nuihpui ham ham tawh a, tun tumah pawh hian kan nuapan lai hun (ti ve khanglang ila) ka damchhunga ka theihnghilh leh ngai tawh loh tur, ka hun tawn nuihzatthlak tak tak te ka rawn ziak leh chiam dawn a ni.

VERY VERY SEXY BODY-SPRAY :

Pathian zarah enthla miah lovin (!!!) ‘Matric’ an tih chu kan pass ve ta a. Matric pass nih chu alo nuam kher mai. Kan barel pawlah ‘Dustin LKPA Martic Passed’ tih kan ziak kuau mai a,

Read more »

Ka Diary Manto Tak Mai Chu - Episode I :

Ka CPU hnunglama Internet LAN Cable invuah va ka hmuh apiang hian kan naupan laia computer kan ngaihsan theih zia kha ka hrechhuah leh thin. 

‘Computer hmu lova matric pass’ an tih ang deuh chi kha (‘Pathian zar’ han tih deuh hluai chi ni lem lo mahse) ka ni ve a. Pawl 10 final kan exam tep tawh tih ah kan sikul (‘sap sikul’ tih kher tur) chuan ‘Computer lab’ kan nei  ve chauhva. Khami tuma kan Headmistress in left leh right click diklo mangkhenga min hrilh bak kha matric ka pass hmain thiam dang ka nei lo. Left leh Right click zir tur ringawt khan pawl 10 zirlai zawng zawng te kha lab kawt ah kan in tlar put a nih tak kha.

Thingtlang anhnah ring ta na na na chu sap leh computer ngaihsan ka pe na ve thei hle a. Khatih hun laia kan khua a computer nei awmchhun chu kan High Sikul zirtirtu, Pu.Thlantea kha a ni a, thingpui dawr a a titi na ah “Computer chuan…” an tih tawh kha chuan

Read more »

KAN IDENTITY HI KAN HLOH THEI EM..???

Chhun hi thimin Zan hi eng ta se khawi zawk hi nge 'zan' an vuah anga khawi zawk hi nge 'chhun' tia an koh ang?? Tuisik bawnghnute chhuan so a an leih hnu chu 'tui' tia koh ala ni cheu angem?? zo luite te hian Phai lui lian zawk te an luan fin hnu hian an nihna a hloh thin a ni lawm ni??? 

I nihna i hloh theihna tur a nih chuan i dinhmun kha sawn hlek suh ang che. Zan chu enna in a tuam reng avangin 'zan' tiin an sawi tawh ngai lovanga, chutiang bawkin 'chhun' pawh thimna in a chenchilh reng avangin 'chhun' tih ani ngawi tawh lovang. Zo luite thiang pawh a aia lian leh luang chak zawk 'Phai luipui' a fin tawh chuan 'Zolui' tia koh a ni tawh hek lovang.

Read more »

THAWHLEHNA :

Muslim pakhat hian intithei takin Kristian hnenah, ”keini chuan Kristian te neih ve hauh loh kan nei asin.Medina-a kan kal chuan,kuang pakhat kan hmu a;a chhungah Mohammed-a ruang a awm avangin ani chu khawvelah hian alo awm ngei ani tih a chiang.Nangni ve chu Jerusalem ah kal ula,thlan ruak bak hmuh tur in nei ve reng reng hlei nem,”atia.  

 Kristian chuan,”Iti lawmawm hle mai,I thil sawi kha a dik lutuk!chu chuan chatuan a danglamna a thlen ta a.Thlan ruak kan hmuh avang tak chuan kan zuia hi tholeh Isua Krista ani tih kan chian theih phah ani,”ati ve hmiah.

Read more »

MIN NGAIDAM RAWH

Zing daifim te leh,
Zan boruak thiang te hian;
Siamtu ropui zia an hrilh thin.
Hna kang ngailo luipuite,
Sirva leng hramthiam zawng ten;
I ropui zia an lantir thin.

cho: 
Kei zawng Lalpa ka hril ngailo,
I ropui zia hi;
Ka tana I thatna,I malsawmna zawng tehi,
Ka tan mai ka hmang fo thin,
Min ngaidam roh,LALPA.

Read more »

TUNGE MIHAUSA CHU????

Tunah hian Khawvela mihausa ber hi lo nita thut ila chuan tuna ka hmilna leh lawmna hmuhsitawm tak te hi hmuh phak ah awm tawh lovin lawmna thar, manto leh changkang tak ten min hual vel anga, tun ai hian thian, laina leh min neltu, min hmangaih em em tu ka ngah phah bawk ang. Ka nunhlui ka thlirkir changin ka nuih aza thin ngei in ka ring a, hmana za em em a min ti nui thin te khan min ti nui zo tawh lovang a (min ti nui a nih pawh in hmuhsitna a tel ngei ang), ka nuih man a to telh telh ang a, Mahse ka hlim nan erawh a man ka pek tam a ngai ngei ang. 

Ka hlimna chu ka thinglungah nilovin ka sum leh thil neih ah te an awm anga, ka duh leh tha ka tih apiang ka neih theih avangin khawvel hi ka tan a zim telh telh thung ang.

Read more »

DAVID BECKHAM : ‘BETTER LATE THAN EARLY’

                

           Zinadine Zidane kan hria; Ronaldo Luiz nazario de Lima pawh kan hria; Thiery Henry pawh kan hre vek. Inkelh an thiam a, inkhelh ngainatu te tan chuan ngaihsan loh rual an ni lo, khawvela chawimawina sang ber ber leh hlu ber ber an dawng tawh tlat alawm!  Mahse, Football khawvel 90’s chho vela sawi nghingtu David Beckham erawh a bangah chawimawina sang ber ber leh ropui tak tak te intar phe chuai ve lo mahse a chanchin hi kan sawi bang thei mawlh lo. Kan ‘nghilh’ thei mawlh lo a ni.

MIFING TEN RIMTUI AN HLAN VE LOH LAL THAR LO PIANG A CHU!! :

May ni 2, 1975 khan Whipps Cross University Hospital, Leytonstone, London, England ah Khawvel mipa te zinga sakhming mawi ber ni turin ‘ David Robert Joseph Beckham’ hi alo piang a. A pa hi David Edward Alan Ted Beckham niin ‘Kitchen Fitter’ a ni a, tin, a nu hi Sandra Georgina niin ‘ hair dresser’ a ni bawk.

Read more »