LA THLA RAWH :

Professor chuan an zirlai tan nan, a kutah chuan rialno a chhunga tui awm chu a keng va va a. Pindan chhunga awm zawng zawngte hmuh tur chuan sang deuh takah a keng a. 

“He no rih zawng hi engzah nge a nih in rin?” tiin a zawt a.

“Gram 100... Gram 50... Gram 150” zirlai naupangte chuan an inrinsiak laih laih a.

“A nihna takah chuan kei pawh hian ka buk phawt loh chuan a rih zawng ka hre thei mai bik lo a ni. Mahse, ka zawhna zawka chu – he tui/rialno hi minit enge maw zah keng ta ila enge thleng ang? tih hi a ni,” professor chuan a ti a.

“Engmah,” naupang chuan an chhang a.

“Awle, a tha e. A nih leh darkar khat ka kenin enge thleng ve ang le?” 

“I kut chu a kham hlein ka ring..” naupang pakhat chuan fiah kek kawk tak hian a rawn chhang a.

“Chhanna dik a ni. Awle, a nih leh nilengin he tui/rialno hi keng ta ila enge ka chungah thleng ang?” professor chuan a zawt leh a.

“ I kut chu a khamin a mu nasa hle ang. Tin, i tihrawlte a kham tentun anga damdawiina kal i ngai hial mai thei a ni...” naupang chu an nui huk a...

Read more »

MARK TWAIN POPULAR QUOTES :

* "Zawhte leh Dawt an in an lohna chu zawhte chuan nunna pakua chiah a nei hi a ni."

* "Lehkhabu tha chhiar ngai lote chuan lehkha chhiar ve thei lote aia chan thatna an nei bik lo."

* "Hrisel theihnana kawng leh khan awmchhun chu i ei duh loh thinte ei a, i in ngai lohte in a, i tih zen zen lohte tih thin a ni."

* "Thinrimna chu Acid chi khat, a leihbuakna aia a vawnna bur tana hlauhawm zawk chu a ni."

Read more »

ISUA KUTAH :

Sipai pakhat hian a nupui thar chu an ram lamah hawpui a tum a. An hmaah chuan lui lian tak kân tur a awm a. Chu luipui chu inkar kâi tumin lawnglêngah an chuang a.

Chutia an chuan lai chuan, thawklehkhatah thlipui a rawn thawk ta phut mai a. An chuanna lawng chu nasa takin a rawn nuai ta a.

Thlipui chuan an chuanna lawng chu a sawisak nasat êm avangin, a nupui chuan a hlau hle a. Beisei tur nei tawh lovah a inngai a ni. Mahse, a pasal erawh chuan hlau hmel pawh a pu lo.

Thli chu a chakin a na hle a, an chuanna lawng erawh a lian lo hle a. Lawng chu engtik lai pawha pil mai thei a ni. Mahse, sipai chuan engmah thleng lo ang hmiahin thlamuang takin a thu reng a. Eng thu mah a sawi lo.

Mahse, a nupui chuan a hlau nasa mai si a, aw khur hlawk hlawk chung chuan a pasal chu, “Hlauhna chhe tê pawh i nei ve nange? Vau kam kan inkar kâi zo dawn lo tih a lang reng hi. ‘Nge i â tawh zawk?” tiin a vin tuar tuar a.

Read more »

"Christmas Shoes" - New Song

Krismas ni a hêr chhuak tep a

Kei chu mî intlar put zingah chuan ka ding ve a,

Thil pêk pahnih-khat lei turin.

Mahse, Krismas boruakah erawh ka chêng lo.

Ka hma chiaha ding chu

Mipa naupang manganna hmêl pu chu a ni a;

Mipa naupang dang ang bawkin

A hawi kual a, a mit erawh a ngui êm êm a,

A kuta a ken chu- Pheikhawk khing hnih a ni.

A thuam chu a hluiin a tet nasa hle a,

A chhîp atanga a ke hmâwr thlengin a bâl a;

 A thil lei man pêk a hun chuan

A thusawi chuan ka rilru a va khawihin

A va ropui tak em!!!

Dâwrkaitu hnenah chuan :

“Ka pu, he pheikhawk hi lei ka duh a ni,

Ka nu tan ka duh a ni.

Zânin hi Lal pian zân a ni a,

He pheikhawk hi a ke tawk chiah chiah a ni.

Khawngaih takin I hmanhmawh thei hram em?

Ka pa chuan hun a tam tawh loh thu a sawi a,

Ka nu chu natna khirh takin a tlâkbuak mêk a ni.

Mahse, he pheikhawk hian a nuihtîr ngeiin ka ring a,

A nuih chuan a hmeltha a,

Chu hmel duhawm tak chu ka hmu châk a,

Isua a tawh hunah chu hmêl ngei chu

Pûin a hmêl chu duhawm se ka duh a ni.”

A pawisa chu vawi engemaw zah an chhiar a,

Dawrkâitu chuan, “Ka fapa, a tâwk zo lo a ni.”

A iptê chu a zen a, a zen leh thin a,

A rawn hawi chhuah leh chuan :

“Ka nu chuan Krismas hlimawm tak a hmang thin a

Mahse, kum tam tak chutiang chu a hmang tawh lo.

Ka pu min hrilh rawh, engtin nge ka tih ang?

Engti kawng zawng pawhin he pheikhawk hi ka lei a tul a ni.”

Chu veleh kei chuan ka pawisa ka phawrh vat a,

Dawhkânah chuan ka dah a.

Engti kawng zawng pawhin ka puih a ngai a ni.

A hmêl mawi lutuk pu chunga a thusawi kha

Engtikah mah ka theihnghilh leh ngai tawh lovang :

“Ka nu chu a va mâwi dawn êm!”

Lawmthu sawia a tlân lai ka hmuh chuan

Ka thinlung chu Van Hmangaihna chuan a tuam nghâl a,

Ka taksa leh thlarau chu tihdanglamin a awm a ni.

Pathian chuan kha naupang tê kha,

‘Krismas Awmze Dik Tak’ min hrilh turin a rawn tîr a ni.

Read more »

THOSI NO :

Nikhat chu Thosi no pakhat hian a nu hnenah chuan, “Ka nu hei ka thlate pawh an lo puitling deuh tawh bawk a, pawna ka thlawh chhuah min phalsak ve tawh rawh,” tiin a lo dil a.

“Mate, I pa tlaia a rawn haw hunah I dil dawn nia,” a nu chuan a ti a.

Tlaia a pa a rawn haw chuan thosi no chuan a pa chu a lo dil ve leh a, a pa pawh chuan a dilna chu a lo pawmsak a. Mahse fimkhur hle turin a chah a. Thosi no chu a phur kher mai a.

Darkar khat hnu velah chuan thosi no chu an inah chuan a rawn haw leh ta a.

A pa chuan, “Enge mate I thlawh zir chu I tluang em?” tiin a lo zawt a. Thosi no chuan, “Aw, ka pa a nuam khawp mai. Thlawh ka thiam hle a niang mihring ho pawhin kut min benkhum dar dar mai...!”

A pa chuan a fapa chu a mitah tak enin, “Mate, him dam taka I rawn thleng thei chu ka va lawm tak em! Khang ho khan lawmpuina emaw thiam an tih vang chea kutbeng an ni lova, nangmah thah an tum vang zawk che a nih kha. Min thah nana an hriamhrei hman thin a nih kha,” tiin a hrilh ta a.

A zirtir : Mi tam tak chuan fakna aw kan hriat hian kan lawm luat avangin engkim kan theihnghilh fo thin. Fakna aw hi mi tam tak tan chuan chhiatna-tlakranna aw a ni thin a ni.

Read more »

Ka Rilrem zawng Player te :

Khawvelah inkhelh thiam avanga millionaire ni ta, mi maktaduai chuang an awm tawh a, a thente phei chu khawvel awmchhunga hming dai ngai tawh lo turte an ni. Dai tawh lo tur khawpa hming chhertu chuan inkhelh a thiam hle a ngai a, chu chu a hausakpui pawh a ni reng a ni.

Mahse, mite aia chungchung fal em em pawh ni lo, an khawsakdan leh an chezia a danglam em avanga beisei aia lar leh sum huilut hnem erawh tam tak an awm thung. Heng zinga ka duh em em, an inkhel ai pawha an chezia ka lawm zawk, an nungchang leh khawsakzia ka lawm em em player, ka kutzungtang thliakin kan rawn chhiar diat diat ange :

Paul Scholes :

Tul hle lovah chuan a tawng mai mai lova, a ngaihdan a pelh hunah erawh a ngaihdan chu card a hmuhpui thawt thin.

Read more »

SINIÂRTE HNENA KA PU SHAKESPEARE-A THURAWN :

Kan Baibul thianghlim chuan, nu leh pate thu zâwm chu an dam rei ang, tiin min zirtir a. Mahse, rei tak an nula/tlangval ang tih erawh a sawi lang tlat lo. He thu kim lo tak hi pu Shakespeare-a chuan a hun remchangah lain, kum 18 mi lek ni chunga double thosilen tu emaw a lo kaihthlakpui tawhna chu khuhmawi a tum teh chai nge ni, a sonnet bu, ‘Sonnets’ tiha a sonnet hmasa ber, ‘From Fairest Creatures We Desire Increase’ tihah chuan ngam sârhin tlangval damreite a rawn hrawk hrâih mai.

He sonnet-ah hian engvanga pawisawi lo, mi khawhar, tum lui reng pawh ni lo, tlangval siniârte hi rawn bei chiam mai nge a nih? Kan ti mai thei. Hei hi hre phawt ang: Elizabethan Era (1558-1603) a thuziakmite thang chhuah ve theihna leh an suangtuah lian ber chu, “Lal Nopui Hlan” (Royal Patronage) dawngtu nih kha a ni. A chhan chu, chu chawimawina chuan – sum leh pai, venhimna leh zahawmna te a ken tel vang a ni. Heti a nih avang hian, pu Shakespeare-a pawh hian a khingpui dangte ang bawkin lalnu chawimawina dawn ve a chak hle a. Lehkha chhiartute suangtuahna a lak pen theihnan tiin, khatih hun laia thuziakmite thu ziahdan kalhmang (tradition) atanga a ziahfung thaidan her danglamin, ‘Mi tih loh dan’ ang deuhvin, a sonnet tam zawkah hian hmeichhia aiin mipa mawdel-ah a hmang ta zawk a ni.

Shakespeare-a hi a mawl chhe lo va, thurawn a pek turte tuiêk lek lek a fak phawtin, a tlar tir lamah heti hian an tan te te a :

"From fairest creatures we desire increase / That thereby beauty's rose might never die," 
“Hmeltha sawiselbote hi tu leh fa nei turin a tha ve lem lote hi chuan kan duhsak thin. A chhan chu an hmelthatna hi chhuan tam tak thlenga hringfaten an chhawm zel kan duhsak thin a ni,” tiin an tan te te a, chutah fakna bawk a meiah an zial tel leh a,

"But as the riper should by time decease / His tender heir might bear his memory:"
“A taksa mawina chu leiin ei ral hun ala nei dawn a, mahse, a thatna chuan a chithlahteah hriatreng tur mawina chu ala hnutchhiah dawn a ni,” a tihna tluk a ni.

Mipain hmeichhia ni lova mipa vek sakruang mawina an sep zar zar mai hi, chhiartu thenkhatte chu an lo ip châwih châwih ngeiin a rinawm. Mahse, mipa zawng phur taka ekin khur laihtir dawn chuan nu berin a zanlam hun awl a hman thiam a ngai thin a ni, tih pu Shakespeare-a pawh hian a hre kar mai.

Chutah le, tlar 14 (sonnet) a tlar 4 lai faknana an hman zawh tawh hnu chuan, a kawpui a rawn lai chhuak tan ta! A tlar 5-na leh 6-naah chuan heti hian a thu kung chu an rawn phun sawn tan ta :

"But thou, contracted to thine own bright eyes / Feed'st thy light's flame with self-substantial fuel,"

“Mahse, val man tam, I chhingmit paw no ruai maite kha I tan I hauh tung zel a, I tisaa mawina leh enna zozaite pawh I tam hnemtu atan I lem zo zel a,” tiin a zikno an rawn sik bal tan a. Chutah a hampui zen chho lehin tlar lehah an tawlh chho leh hret hret a :

"Making a famine where abundance lies 
Thy self thy foe, to thy sweet self too cruel:
Thou that art now the world's fresh ornament 
And only herald to the gaudy spring,
Within thine own bud buriest thy content 
And, tender churl, mak'st waste in niggarding:"

“Ei tur tam tak a awm laiin khawvel chu rimtamin in dah a, nang leh I hmelma, I duhawmna kha I nunrawnpui em a ni. He lei thil mawi zinga mawi ber, favang ni ti ngaihzawnawm tura puangdarhtu I sakhmel mawina chu I hma I sial luatah up bovin a awm ta! Fur tuihawkin pangpar til a len bo ang maiin, I mawina chu mawi leh ngai tawh lo turin I len bo zo ta a ni,” a tihna tluk a ni.

Mahni inngaihbel thei tam tak kan readers zingah pawh hian kan awm ngeiin ka ring. Mahse, he sonnet atanga kan hmuh hmaih miah loh tur chu – pu Shakespeare-a hian hmel naran lo pu rei nazawng hi a ui vek kher lo va, vanduai vang maia leng rei tate pawh a ngaihsak vakin a lang lo. Mahse, taksa pianhmang leh hmel pu vannei bikte erawh a ui hliah hliah bik a ni.

Mi tam tak chuan hei sonnet hi khatih hunlaia lal chi leh kuang, nula leh tlangval hmeltha tak tak, in la hai-fai tak tak tihthaihnan leh sawithaih nana a ziah niin an ngai thin. Tin, mi thenkhat leh chuan, naupang te a nupui a lo neih tawhna hliahkhuh nana a ziah nite pawhin an sawi bawk. Mahse, a tawp akharna tlar hnih (couplet) hian a thahnemngaih vanga ziak a ni, tih chu a ti chiah hlein ka hria:

"Pity the world, or else this glutton be / To eat the world's due, by the grave and thee."
“Khawngaih he lei mihringte chungah hian zahngai hram ula, fa thar lo piang chhuak leh turten chen dâk chakawm khawp, hmelthatna an hmuh zel theih nan FA HRINSAK RAWH U. A nih loh zawng, mahni hmasial in lo ni dah a nge,” tiin duhthawk takin a tlang a kawm thei hram a ni.

Read more »

HMEICHHIA -

H-ahdam leh hahchawlh an thlahlel a, chutianga awmtir thei tur mipa an zawng thin

M-angan changa tanpui an lakna chu eng mi pawh nise, an theihnghilh ngai lo.

E-i loh an ngah a, ei loh nih erawh an duh der lo.

I-nnghah ngamna tur mipa chu an ngaisang hle.

CH-hungte an ngaiin an thlahlel em em thin a, an chhungkaw ngaihpawimawhsak thei mipa chu an nel thuai zel.

H-mangaihnain awmzia a neihna ber chu hmeichhe thinlung hi a ni.

I-nti vei leh chapo an ngai thei lo hle a, chutiang mipa chu enganga khawsak sang pawh ni se an ngaisang ngai lo.

A-ruka hmangaih neih an thiam em em a, an duhnaah chuan mipa aiin a let tam takin an insum thei zawk.

Read more »

Fergie-a Ni Hnuhnung Berah Chawimawina Nopui :

Kum 26 chhung zet Manchester United lo enkawl tawhtu, Sir Dr. Alex Ferguson chuan mihrang dangte ang bawkin a hun hnuhnung ber chu hnehna ropui tak nen a hmang liam ta!

Manchester United chuan kar engemawzat kal ta atanga an lo hlawhchhuah tawh, khawvel football league-a title ngaihhlut ber, Premier league nomawi tlanchhuah na’n an mual ngeiah Swansea chu 2-1 in an lo hneh keuh.

Rio Ferdinand-a’n kum 5 hnua a goal thun awmchhun ni turin minit 87 naah mualneitu chakna goal a rawn thun a, hei hian pu Alex-a tan point 3 hlawhchhuakin, a game 723-naah premier league nomawi a vawi 13-na atan a rawn chawi leh ta a ni.

 Boruak thengthaw nuam tak hnuaiah, United fans te chuan kum 26 chhung teh meuh an tana thil ropui tak tak lo tihsak thin tawhtu, an pu Ferguson-a leh kum 15 chuang an tana rinawm taka lo khel tawh, Paul Scholes-a te inkhel hnuhnung ber en tur leh, an league tiltle 20-na lawm turin Old Trafford-ah an rawn pungkhawm a, an thawm pawh a tha ham ham kher mai!

Tunnel chhung atanga Fergie-a a rawn chhuah hma chuan, Old Trafford chhunga mipui 70,000 te chuan flag sen lo vaiin, Scot mihrang kum 71 a upa, chu, “Mangchhia mangthaa chantirtu...” tiin khelmual chhungah an lawm lut a, team pahnih players te bang siam inkarah chuan a rawn kaltlang a. United Scoreboard-ah chuan “26.38” tih an rawn tar kulh a, hei hian Old Trafford-a a kum hmanral tawh leh a nomawi chawi tawh zat a entir a ni. He ni zet hi zawng nghilhloh nghilh ni a lo thlen hun pawhin nghilh a ni leh ngai tawh lo vang.

Swansea lam hian chak an mamawh hle a, chutih rualin anni aia chak mamawh zawk chu, pu Fergie-a hi a ni. Minit 39-naah Javier Hernandez-a chuan a sen ho hmahruaina goal a rawn khung a, heta pu Fergie-a  lawm lutuk hmel hi United tan lotute tan pawh hmuhnawm a tlingin a rinawm. Mahse, Swansea lam tan Michu a rawn inlar ve leh a, minit 49-naah an si phurh a rawn sut ve. Fergie-an drawn game hmangin a hun tawp a khar dawn emaw an tih laiin, hun tawp dawn minit 87-naah kum tam tak a tana rinawm taka lo khel tawh thin, kum 5 zet United tumpuite lama goal khung tawh lo, a fachuam, Rio Ferdinand chu insum zo ngang tawh lovin, a hun hnuhnung chu ropuinain a rawn khar sak ta a ni.

Inkhelh ban veleh nidang anglo takin, Fergie-a chu khelmual chhungah a lut nghal a, tawngrinna chuhin a rilru a thu baw liam zawih zawihte chu a rawn sawichhuak a. A players te, a thawhpuite leh supporters zawng zawnte chungah lawmthu a sawi a ni. Harsatna a tawh chang te, rilru buai leh mangang taka a awmlai zanwg zawnga a kianga ding reng thinte chungah lawmthu a sawi bawk. He lawmthu kam tlem te hian amah hmangaih ngawih ngawih tute mittui chu a sur tir zawih zawih a ni ber.

Pathianni zan hian United tana khelh 717 lai khel tawhtu, Super Paul Scholes chu a vawi hnih na’n thlah nghal a ni a, minit 66-naah Anderson-a’n a rawn thlak. Old Trafford-a hmangaihna tem hne thei lo, Paul Scholes-a inkhel bang rawn chhuak chu mipuiin zahna an lo entir.

Pathianni zan inkhelah hian a tawp thlengin mual neitu an chungchung tluan thak a tih theih a, mahse Swansea lam pawhin goal khungna hun tha an bawhpelh ve nual. Wayne Rooney squad-a a tel lo chuan mi ngaihven a hlawh hle a, hei hian United chhungkaw rilru a tarlang chiang hlein a hriat. Mahse, pu Alex-a chuan Rooney hi chhuan an tum loh thu a sawi. Rooney hian an manager thar tur hi office a rawn luah hma hauh atangin a lo mil lo lawk, nge ni anga, lungawi lohna dang a nei zawk? Nge United-ah hian a tlatlum tawk tawh lo niin a inngai zawk? Tih chu tunlaia zawhna tam ber a ni. Engpawh nise, nui vur vur chunga medal a awrh lai hmuh ala ni tho va, a pu hlui ni mai tur nen pawh an inhaw viau lo niin thlalak then khatah chuan a lang.

Paul Scholes pawhin trophy an lak leh takah chuan, “Mission Accomplished” a ti ve ta! Amah thlak zo tur hmu leh tak ang maw?

Champion nomawi chawi lai thlalak tlem i lo en ho ang u hmiang :

(A vawi 20-na meuh zawng tumdang aiin an lawm bik emaw tih mai tur a ni)

(Rooney pawhin mat chhing meuhvin a chawi e...)

( Hmelthat reng an tum mawlh tawh lo...)

( A tu 11 te'n khelmual chhungah an rawn lawmpui ve a...)

( A tawpna meuh zawng, hnar sawi bawi bawiin a fawp e...)

Hasta La Vista Sir. Fergie...

Read more »

NU ROPUI PHENA MI HLAWHTLING : Pooja Chopra (Miss India 2009) Tun Hma Nun Lungchhiatthlak Tak Mai Chu

Zoparrimtui :

Pooja Chopra (Miss India 2009) Tun Hma Nun Lungchhiatthlak Tak Mai Chu

--- Pooja Chopra nu hming hi Neera Chopra a ni ---

--- Hei hi Neera Chopra chanchin lungchhiatthlak tak chu a ni---

Neera Chopra hian hun harsa tam tak paltlang tawhin, hmuhsitna te, retheihna namenlo te leh duhthlanna siam harsa tak takte a hmachhawn tawh a. A fanu (Pooja Chopra) takngial pawh tihlum tura vauna alo dawng tawh a ni.

Hei hi Neera Chopra chanchin, ama sawi ngei chu a ni :

“ A englai ber atanga tan tur nge tih pawh ka hre lo... Khan’g te kha hun harsa takte an ni. Ka pasal nen chuan midang ang bawkin hlim takin kan hun bul kan tan a, mipa pangai tak a ni. Mahse, kan inneihna chu a ni telin a tla hniam telh telh a, hmeichhe dangte ang bawkin hun harsa tak tak ka hmachhawn tan a. Mahse, chu’ngte chu midangte chungah pawh thil thleng thin a nih avangin, ka theihtawp chhuahin chu’ng harsatna te chu paltlang/suttlang ka tum thin a ni.

Ka mona chhungkua chuan mipa ka neih chuan an lawm a kim tur thu min hrilh a, mahse, ka fa hmasa ber a rawn pian chuan, mipa nilovin hmeichhia a ni a. Chu chuan ka hmaa ka suttlang tur harsatna bang chu a aiin a ti sangin a ti chhah zual sauh va. Kan inchhungah chuan inthlahrung reng rengin hun ka hmang thin a. Mahse, ka pasal in chu chhuahsan thei ka ni lo a ni. Ka pa chuan min chawlhsan tawh a, tin, ka unaupa pawhin Bata-ah hna chhe te a nei ve a, anni korit nih chu ka duh bik lo a ni. Chuvangin, hrehawm hle mahse, ka mona in, Kolkata ah chuan ka awm ala ngai a ni.

Ka nu (a pasal nu) chu cancer natna vei a ni a, chuvangin, duat takin ka enkawl thin a. Amah ka bual laite chuan, ka rilru te te chuan amah ka duatna chuan ka tan thil duhawm tak a rawn parchhuah tir ve ngei ka beisei thin a. Ani chuan mal min sawmin min duhsak ve deuh ka ring thin a, mahse, ka nu laka duat beisei chu kutdawh lak atanga lunghlu phut ang chauh a ni si a.

Engtin nge kha’ng hun harsa zawng zawngte kha ka lo paltlang theih le? Tih tun hnu hian ka ngaihtuah leh thin. Ka pasal min en dan chu a dang tial tial a, min hmangaih awm pawhin a lang ngai tawh lo. Tette atanga Non-Vegetarian ka ni a, mahse ka chhungte tihlawm nan sa chi hrang hrang siam dan leh sawngbawl dante ka zir a, chu thil ka tih nachhan chu kan inneihna chu chawm nun zel ka duh vang a ni.

Hun a kal zel a, ka lo rai leh ta a. Pooja-i ka pum chhunga ka pai lai chuan, ka pasal chuan kan inah chuan nula pakhat hi a rawn hruai lut a. Chu nula chu neih a tum thu a sawi bawk a. Ka rilru ava na tak em! Ka hmangaih em em, ka pasal chuan fapa ka hrin sak theih loh vang ngawtin min phatsan thei a, chu mai nilovin ka harsatnate chu min hriatthiam pui mawlh lo a ni. Intihhlum ka tum a, mahse beiseina eng mit lek lek ka pumchhunga awm chuan min chhanhim thei hram a ni. Fapa ka hrin hlauh chuan engkim a tha leh vek mai ang, tiin ka inhnem a.

Pooja-i alo pian chuan, hmeichhia a ni tih an hriat veleh min tlanbo san (ti mai ang) nghal a. Hospital-ah chuan ka fanu pianghlim nen chauh chuan kan awm a. Mahse, vanneihthlak takin ka mutna sira damlo awm ve chuan ka fanu kawr leh mamawh turte chu min rawn pe a. Pooja-i ni 20 vel lek a nih lai chuan, ka thutlukna chu ka siam fel ta! Ka pasal in chu chhuahsanin ka fanu pahnih, Pooja-i leh Shubra, kum 7 mi te chu ka vavaih pui ta a ni. Khami ni atang khan ka pasal kha kala hmu leh ngai lo. Keimah leh keimah chu intiamin, ‘chhang per khat chauh pawh eitur kan hmu a nih chuan ka in sem ang,’ ka ti a.

Mumbai lamah ka nu leh ka unaupa (nupui nei ta) kan bel ringawt a, mahse, naupang nen chuan a buaithlak tlat tawh. Sum leh pai lamah kan harsat em avangin, Taj Colaba-ah hna chhe te thawkin ka inhlawh ve thin a. Hun rei tak tak hna ka thawh thin avangin ka fate pawh ka enkawl tha hleithei lo a ni. Engtin nge khatih lai kha kan khawsak thin le??? Anmahniin an homework-te chu an ti thin a, ka office ka ban tlai deuh changte phei chuan anmahniin rawng anlo bawl thin a ni.

A thiante piancham lawmnnaa a kal changte hian, Pooja-i chuan a cake dawnte chu dah thain inah a rawn hawn a, a u nen an ei dun thin a ni. Shubhar-i’n hna a rawn thawh ve hnu thleng khan, a chhun chaw dawnte chu dah thain a tuka Pooja-i’n sikul-a a pai atan a rawn hawn thin a ni. An sikul mawza, pheikhawk leh uniform lei turte kha ka va thawkrim thin em! Bangur Nagar, Goregaon-ah kan cheng a, St. Thomas Academy-a kal turin Pooja-i chuan ke ngatin bus stop pali lai a kal pel thin a ni. Ala tet em avangin, kawng a kan dawnte chuan a bul hnaia awmte chu a in hruai tir thin a ni. Khawngaih hle thin mah ila, an bus kalna fare aiah chuan an taksa bawnghnutea chawm nan ka hmang zawk thin a ni.

Khatih laia ‘Goa Penta’ tihah khan thla khata cheng 6,000 hlawh turin hna ka hmu ve hlauh mai a. Pu Chhabra leh a nupui, kan pu berte chu ka chungah an tha hle a, loan min puk tir ta a. Chutichuan, ka fanute pahnih chuan Pune lamah ka nu nen ka unaunu hnenah ka thawn ta a. Goa-ah chuan kum 4 pumhlum thak ka thawk a, ka pawisa khawl atang chuan Pune-ah in tereuh te, bedroom pakhat awmna ka lei ve a. Nikhatah darkar 16-18 vel hna ka thawk thin a, kum 4 ka thawh chhung khan ka fanute kha kum khatah vawi 3 emaw vawi 4 vel chauh ka tlawh thin a ni.

Pune-a in kan neih hnu leh, Hote Blue Diamond-a hna ka hmuh hnu chuan kan nunphung chu a pangai ve deuh ta a. Tin, a tawpah phei chuan ka nun pumpui thlak danglamtu, ‘Mainland China’ ah hna ka hmu ve nghe nghe a ni. Shubhra-i chuan lehkha zir pahin Hotel Blue Diamond-ah hna a thawk a(hna thawk zinga naupang ber a ni nghe nghe), engtin tin emaw M.Com leh BBM a zo ve nawlh a. Vawiinah chuan Catholic pa, Merchant Navy a thawk nen inneiin fanu duhawm tak pakhat an nei tawh a ni.

Ka Office ka ban hnu chuan tuition ka pe leh thin a, tin, inchhung chet ngai zawng zawngte chu ka ti vek bawk thin a ni. Pooja leh Shubhra-i te pawh nula an lo ni ve ta a, ka mangan leh lungngaih chang pawhin min hnem ve thei tawh a, ka nun chuan awmzia a nei ve tawh a ni. Pooja-i chu lehkha thiam thei tak a ni a, extra-curricular activities hrang hrangah tel ve thin in, ama mamawh – a pheikhawk sang thlengin ama thawhchhuah ngeiin a lei ve thin a ni.

Pooja-i’n TV-a thu a sawi khan, a thinlung chhungril atangin a sawi a ni tih ka chiang a ni. Miss India lawmman a dawn chiah khan, ka rilru chuan, ‘Lalpa, khi khi ka fanu duat-i ngei kha a ni,’ ka ti rilru a ni.”

Pantaloons Femina Miss India, Pooja Chopra-i nu chuan, “Engtik niah emaw chuan ka fanu hian min la chawimawi ngei ang,” a lo ti thin a ni.

Chu a nu rinna chu Pooja-i chuan India mipui sing tam tak hmaah nemnghetin, heti hian a sawi ta a ni :
“Ni 20 leka upa ka nih lai khan,ka nu chu duhthlanna siam tura nawr a ni a. Keimah, hmeichhe nausen nge ka pa? tih a ni. Ani chuan a pasal in a chhuahsan rual chuan, ‘He hmeichhe naupang hian engtik niah emaw chuan min la chawimawi dawn a ni,’ a ti a. Chu ni chu vawiinah hian alo thleng ta! A pasal chuan hmeichhe dang, fapa pahnih neihsak tu a nei leh a. Vawiin ni a helai hmun a, Miss India anga ka din lai hian, ka pa chuan a fanu ka ni tih a hre dawn nge hre dawn lo tih ka hre lo. Mahse, chu a fanu a duhloh chuan tunah chuan chawimawina lallukhum khumin khawvel a hneh ta a ni.

“ Kan nun kha a awlsam lo hle a, ka nu tan bik phei chuan harsa tak a ni. Sum leh pai, rilru leh thlarauvah ka rethei em em a, nasa takin kan tan a thawk thin a ni. Ka hna ka tan ve pawh khan, kha ka nu inpekna khan chakna leh huaisenna min pe thin a ni. Vawiin ni a, miin min lawmpui thu min hrilh te hian, keimah ni lovin ka nu hnenah chawimawina an hlan a ni tih ka hai lo. Ka nu kha nu dik tak a ni a, ka mit tan ENG a ni a, ka ZIRTIRTU a ni a, ka CHAKNA a ni. “

< Dustin Sampler >

Read more »

Michael Owen-a Football Zinkawng

Nula tam tak chuan a hmelthat vangin in hria pawh a ni mai thei. Mahse, football ngainatu leh a ngaihna hriate chuan he English hranghlui hlui lo tur hi, goal ban hnunga lên thlun a tih puar ngun em avanga hria an ni hlawmin ka ring.

Hmanni lawka Inbeihna phul hmun chhuahsan a, football mangthatu, Michael James Owen hi hrechiang lo kan la awm takin, thlalak nen ngei a football zinkawng tawi tein ka rawn tarlang ve zuai ange:

1. Footballer hranghlui,  Terry Owen –a fapa, Michael Owen hian tette atanga football khel tanin, Kum 13 mi a nihin School aiawhin football a khel ve a. Chak taka a ball khalh chu Brazilian keeper chuan a keah a rawn man chawt mai a. Mi tam takin a tlu mai tawh tura an ngaih lai chuan, penalty hlawh tura tluk lovin thei leh thei lovin a ding a, goal mawi tak a khung a ni. Khatih laia an manager, Terry Venables pawhin a chetdan chu a fak hle a ni.

Read more »

HMANGAIHNA HI KA TAHPUI THIN ASIN...

Thiante zinga pawt hnem ber leh, titi vawrtu ber ka nih thin avang hian mite chuan engtik lai pawha hlim reng turah min ngai fo thin. Kan inchhungah fiamthu thawhtu ber niin, a uang peih ber ka ni thin. A chang leh khuang vaw dap dap paha si hluam hluam chungin chhung inkhawm zai min hruai tir thin a, a chang leh hla chang sawituah te min hmang thin. Mahse, nundan pangai leh mipangaite khawsak dana khawsa a min ngaih lai hian, kei hian ‘Hmangaihna hi tuktin-zantin ka tahpui fo thin a ni,’ tih erawh tuma’n an hre hauh lo.

Thla chu van sangah chuan zan dang ang bawkin a rawn eng leh kulh mai a. A eng paw no riai mai chuan ka vel chu a chhun eng kulh mai a. Ka room kawngkhar chu ka hawng a, ka khabe chu ka kutphahah nghatin van lam chu ka thlir vawng vawng a. Zan chu a reh ngawih ngawih a, a khat tawka ui bauh ri ka hriat thin bak chu eng thawm mah hriat tur a awm lo.

“Aw, Chhawrthlapui nunnem leh zan boruak zaidam tak te u, ka tan hian in va han hlu tak em! Chhunah ka thlarau chu intlansiakna khawvelah a ram chhuak a, chau hnapa a awm hnuah nangni chuan in mawina zawng zawngte nen a hliam chu tuam dam tumin in awi a... In rimtuina hi tu hian nge hne thei ang le? In zai rimawi hi tuin nge ngaithla ning ang le???

“Mahse, aw.. Chawrthlapui min ngaidam lul ang che. Ka nun hi a tui hal em a, i eng mawina pawhin a tuihal chu a hnem zo lo a ni. A hnem zolo mai pawh ni lovin, a tuihal dangcharna chu a ti zual sauh zawk si a. Hmanah I eng hnuaiah biahthu kan tiam tawh a, i eng chu kan thutiam min hriatpuituah kan ruat a nih kha. Van zawla i rawn kai apiangin banah vuain biahthu thuk ber kan inhlan thin a, i mawina zungzam chuan min phuartu Hmangaihna hruithlun chu a hual vel thin a nih kha. Mahse, tunah chuan kan hlimna chu vai dai-tui angin a tham ral ta..! I eng hi kei zawngin ka tahpui ta’ng e.”

‘Ka ngai che ka di bawihte,
Nang ngaia Kumsul ka hmang tur hi;
Chhawrthlapui alo en chang hian
Nang ngaih alo zual leh thin.’

Ka mittui hian tuifinriat siamin, ka lungngaihna hian hremhmun thlengin min phih liam dawn mahse, nang ngai lova zan-khua var ai chuan I hmangaihna hi tahpui fo ka thlang zawk a ni. Nang nghilh a tui taka zanmu chhin ai chuan, nang ngaih vanga ka tah mittui chu khua varpui pawh ka thlang zawk e...

‘Hmangaihna nunrawng’ tiin miin I sakhming au thin mahse, Nang chu ka chunga i nun a rawng pauh leh, ka hringnun hi a famkim zawk thin a ni. Zan-tin ka tukverh atang hian min hriatpuitu siar leh thangvan dumpawl riai leh zan chawitu, chhawrthlapui te chu ka thlir thin a, ka duhthu ka sam fo thin a ni. Hmangaihna chuan he khawvel atang hian min hnawl mahse, ka tan chuan a ropui em a, damchhung tahpui thamah ka ruat a ni.

‘I sakhmel ka chhingmitthlaah a cham reng,
Ka hlimna ber a ni si;
Theih chang se fan leh ka nuam thin asin,
Kan tuanna mual zawngte kha.’

Ka neih ro-sumin a hmangaihna chu phu lo mahse, ka hmangaihna thinlung erawh hi chuan a phu asin! Zanmu ka chhin apiangin i nui hmel chuan min awimu thin a, tawnmangah chuan kan hlim dun thin asin..! Hmanah chuan ‘Ka hmangaih che’ tiin i aw mawi tak mai chuan min awi mu thin a, tunah erawh ngaiin au mah ila, thlaler ramreha au ang chauh ka ni dawn si a... Ka hringnun hian ava ngai tak che em!

‘I aw mawi thangkhawk ri a cham reng lairilah,
Biahthu hlan lova laikhum ka zal tur hi?
Ka dawn ngam mawlh lo a na ngei e,
Kan hlim lai ni tawnmang mawl an chang tur hi!’

Zing khawvar chuan intlansiakna tual zawlah ka duh vang pawh ni hlei lovin min kaihpen a ngai leh thin a, nuih a ngai a, hlim a ngai thin. Theihtawp chhuaha beih a ngai a, chakna zawng zawng sawm khawm a ngaih chang a awm fo thin. Thenrualte zingah hun hman a ngai thin a, harsatna tawkte tan kawng kawhhmuh a ngaih chang a awm fo thin. Chona thar a lo piang a, ka bei a, ka hneh a, a thar alo chhuak leh thin. Mahse, heng zawng zawngte hian ka hmangaih ka hriatrengna lak ata chu englai mahin min kai peng ngai lo.

Infiamna tual zawlah hlim taka mi an len laiin, kei chuan ka pindan thim thuk takah hian ‘HMANGAIHNA CHU KA TAHPUI FO THIN ASIN...’

© Dustin Sampler

Read more »

I THINLUNG THIANGHLIM, TUMAH LA HMANGAIH NGAILOHNA NGEI KHAN...

Zoparrimtui I THINLUNG THIANGHLIM, TUMAH LA HMANGAIH NGAILOHNA NGEI KHAN... Mipa hi zawng kan thikthu hi kan pe chhe ve khawp mai. “I thinlung thianghlim tumah la hmangaih ngailohna ngei khan e...” tihte hi, rulhhlut damdawi ei ngai hlei lovin rulhlut pai sa(meat) alo ei duhloh ve ngawt, ang deuh ni hian ka hre thin. Ti hian ka ngaihtuah mai mai thin : ‘Thinlung thianghlim’ tumah la hmangaih ngailohna thianghlim loh dan tur hi!!! Tih mawlh maiah hian ka buai a ni. (He hla phuahtu ka demna leh, “a phuah pai deuh mang e a...” ka tihna lam ni lovin, mipa diktak rilru huaisen taka a rawn tarlanna hi kan nula hote hian an lo helh takin, tiin Pu L.Keivoma tihdan takah, ka ziakmi kam zalenna hmangin tawi tein he hla tlar hnih/khat lek hi kan lo kawmen ve lawk duh a ni.) Phat rual lohvin, he hla tlara hmangaihna a sawi hi, ‘Nula leh Tlangval inhmangaihna’ a nih a rinawm a. Chuti a nih chuan, he hla phuahtu hian ngaihzawng la nei ngailo nula, sawi a tumna a nih ngei a rinawm. Mahse, ‘Thinlung Thianghlim’ sawi nana ‘Tumah la hmangaih ngai lohna’ a hmang ta erawh hi chu a ti deuh mah mah em aw... a tih theih. Mahse, a phuahtu hi miPA a nih miau avangin ‘Thianghlimna’ a tehfung pawh alo danglam zo ta a ni. ‘Hmangaihna’ chu a der emaw a lem emaw a awm thei lo. ‘Hmangaihna diklo’ kan tihte pawh hi, hmangaihna nilo, hmangaihnaa kan lo ngaih thin vang zawk a ni. Hmangaihna chu thil sual hmangaihna a nih ngawt loh chuan, a mawiin a thianghlim em em vek thin a ni. Ha kuh siu-seu tak emaw, meng phang chulh mai emaw, ‘a lum biang’ ang deuhva thau bial chur mai pawh nise, thinlung taka a hmangaih (nawmchenna diklo a tel ve lo)phawt chuan, an pahnih chuan inzawmna thianghlim an nei tihna a ni. Kan Baibul chuan, Hmangaina chu a ngilneih thu te, a zawldawh thu te leh a kualiti hrang hrangte chu duhthawh takin a tarlang a, chu a chhapah Felna leh Rinawmnate chungah ala lentir leh ta nghal a nih kha! Hmangaihna thinlung hi a bawlhhlawh titu chuan hmangaihna awmzia a hrethiam lo a ni. Mahse, mipa erawh chuan chu thianghlimna chu thianghlimna famkimah an ruat phal ta tlat lo mai! Hmeichhe ho khan mak lo ti ngawt suh ang che u. Nui har har chunga i thenawmpa kut zungtang i ulhrik sak kha, nang chuan eng teh ualah ngailo mah la, hmangaihtu che tan chuan ENGEMAW atling tlat a ni. Vawknu sa aia vawkpa sa tui i zawkna chhan a zawh a zawh che pawhin mak ti suh ang che. Mi i hmangaihna chu a thianghlim pauh leh atan chuan a bawlhhlawh pauh thin a ni. He hla ziaktu pawh hian hei hi a hrechiang ve hle ni ngei tur a ni. Eng thil tha lo nge a suangtuah thin? Tu arte nge vawmhlum alo tum tawh? Mi motor ke vawi engzat nge hawlh thep alo tum tawh? Nikhatah mi engzah chiah nge a rel thin? Tih pawh ngaihtuah lek lovin, mipa tana ala hlan loh vang maiin, a thinlung chu Entlangna nei niawm takin, ‘Thinlung thianghlim’ tiin an ko ve ta thuai mai a nih kha. Kha khan, kawng tam takin mipate rilru chu a tarlang chiang hlein ka hria. Hmeichhiate chuan mipa sulhnu chu chhui ve lo mahse, mipate erawh chuan nitin-zantin an sulhnu an chhui sak thin a ni. A chang chuan in inngaihzawn hma daiaha thil thleng pawhin a rilru a tihnat chang a awm fo thin ang. Hrethiam ang che. A chang chuan i hnenah pawh a sawichhuak lo mai thei. Mahse, a ti ngei ngei ang tih erawh ring ang che. Mipate hian thianghlimna hi an ngaihsan em avangin, he hi hmeichhiate hian kan theihnghilh a thiang lo a ni!!! Nulate u, in vawi khat thil tihsual khan in nun pumpui a nghawng thei a ni tih hria ula; thil siam zawng zawng zinga thikthu pe chhe ber, mipate chu lungmuang taka in tanga in bei tir theihna turin in nun kha uluk takin vawng tha ang che u. © Dustin Sampler

Read more »

KA PU SHAKESPEARE-A LOVE STORY :

Zoparrimtui KA PU SHAKESPEARE-A LOVE STORY : Pu Shakespeare-a hi Thu leh Hla lam mai bakah, Hmangaihna lama ka 'Pu' ve ngawih ngawih a ni. Kum 18 mi lek anih laiin, Anne Hathaway, amah aia kum 7/8 laia upa chu nupuiah a nei a, hei hi mi tam takte chuan mak ti hle mahse, a sonnet thenkhatah, hmangaihna awmzia chu khawvel mipuite hrilhfiahin a chhanglet ve sak a ni. Heti hian a sonnet pakhatah chuan kan hmu : "...Love is not love When it alters when it alteration finds, Or bends with the remover to remove;' "Ani chuan, I hmangaihna chu pehhlelna tur kawng thar a hmuh huna peng mai thei a nih chuan, 'hmangaihna' ti a a hming vuah tlak a ni lovang... Anih loh pawn, I lak atang a kian hun emaw, thihna hialin a laksak hunah che pawh, hmangaihna ka sawi thina erawh hi chu a ngai reng ang..." a tihna tluk vel a ni. Tin, tlar dang lehah chuan, "... That looks on tempest, and is never shaken; It is the star to every wandering bark, Whose worths unknown, although his height be taken..." tiin a sawi leh a ni. "Hmangaihna diktak chuan harsatna leh manganna thlipui hmachhawn thin mahse, nghet takin a ding reng thin. Ani chu tuifinriat thim thuka, lawng kawngbo te tan hruaitu hmar arsi ang a ni a, a hlut zawng chu tu hriat nilo mahse, a san zawng erawh teh theih khawpa sang a ni..." a tihna tluk a ni. A hmangaih chuan a ti tuai nalh tak leh, a hmelthatna zawng zawngte chu hloh hun ala nei dawna, mahse hun chuan a hmangaihna thinlung chu engtikah mah a lak kiansak theih loh tur thu a sawi bawk a ni... "Love's not Time's fool..." Taksa mawina chu mit tan chauh a ni a, hmangaihna erawh thinlung tan a ni. Chuvangin, thihna chuan a hmangaih chu thlanmualah hnuk liam mahse, chu chuan a nunah harsatna a siam lovang. A chhan chu, a thinlunga awm chu ala awm reng vang zawk a ni. A thinlunga a hmangaihna chuan Thihna hial pawh a ngam sak ta a ni!!! Keini hian kan sawi kan sawi thin, hmangaihna hi engtin nge kan hmuh ve??? Dong-uk-a sam anga a tual pial ve loh chuan text message inthawn pawh kan ning thuai thin ani lo vem ni? Vawksa kg 1 man em pawh tluk lo, thawmhnaw man tlawm an hak vang ringawt pawhin kan en dan a dang thin a ni lo vem ni? Chhungkhat laina hnai an neih that loh vang ngawtin i zuam thin a ni lo vem ni? In enfiah ang che. A hmelthat vang emaw, lehkha a thiam theih em vang emaw, inkhelh a thiam em vang emaw, a zia thiam em vang emaw, thu ziah a thiam em vang emaw, a che zia a zei em vang emawin I hmangaih pawh a ni mai thei. Mahse, engvanga hmangaih nge i nih tihah buai suh. I hmangaihna khan engang chiahin nge I 'hmangaih chhan' kha a thlang danglam? tih erawh ngaihtuah thin ang che. Hmangaihna hian i nun hlui a thlak danglam lo a nih chuan, hmangaih nia i inhriat chu, "ka hmangaih a ni," ti suh ang che. Hmangaihna chuan hmel ramri a kham lova, neih sum ramri pawh a kham hek lo. © Dustin Sampler

Read more »

KA NU TAN :

Zoparrimtui KA NU TAN : Sap hovin, ‘mother’ emaw a lamtawia ‘mom’ an tih thin leh, kan Bru unau teh ‘aw... amauh’ an tih te hi chu tawng mawilo nilo se, ava pawnlang bik teh em!!! ‘Ka Nu’ pawh ti phal lova, ‘A Nu...’ Mizo ten kan han ti deuh ngaih mai hi chu, ti ril hi a fanin, hâm hi a zen ngawih ngawih bik hian ka hrie thin. Thla tlêm tê ka nih atangin a rim atangin ka chhinchhiah nghal thei a; kum pawh ka tlin hmain, pai chung chungin a hming ka ko ve thin. Nau a zawnga a tap belh pawl nih takah chuan, ka chaw ei duhlo tap riin ka ûte leh then leh rual zawng zawngte a um kian vek hnu pawhin, ka nu chuan zaidam leh zawldawh takin min thlem thin a, kei pawhin a aw ri chu ka hai ngai lo. Beramin a pu aw a hre thin ang leh, uipain a pu aw a hai ngailo ang hian ka beng hian ka nu aw chu, midangte aw aia a ri a mawi bik vang pawh ni chuang lovin, khawii hmunah pawh a hai ngai lo a ni. Naupang dawih tak ka nih avangin, khua a rawn thim hlek tawh hi chuan khaw thim hrim hrim hi ramhuai emaw ka ti zel a, ka nu pawnfen vuan reng lo chuan ka awm ngam ngai lo. Kei aia la dawih leh chhawng, ka u (mama) nen khan a pawnfen kha engzah tak kai thler tawh i maw??? Nu dang pawnfen ang feng phak ve suh mahsela, kha pawnfen tluka pawnfen thlamuanthlak kha he khawvelah hian kan tan chuan a awm leh chuangin ka ring lo. A puanhmawr chauh dektu pawn damna an chang thin ang khan, keini pawhin kan deh ringawt pawh khan kan dam sawng sawng thin a ni. Tun hnua ka nu nitin nun ka thlir kir changa, a nuna ropui ka tih em em chu – Pathian thu leh thudik hmanga a fate min enkawl thinna leh, englai pawha a rilru luah bertu kan nih fo thinna kha a ni. A thusawi kan zawm loh avangin vawi duai lo mi hau thin a, a dan siam kan bawhchhiat changin nasa takin min zilh thin. Mahse, hmangaih taka thil min hrilhfiah thin avangin, a vuakna vualte chuan mi hlawhtlingte vual ang min neihtir thin a ni. Thian hova tui chen leh ram vah te kha chak hle thin mah ila, kan tana hlauhawm a nih chuan a phal ngai lo. Mahse, kan chak viau anih erawh chuan kan tui chennah aman min hruai thlap thlap thin. Ka sawi duh pakhat chu, nu dang angin ei leh intur manto leh changkang min pe theilo mahse, a kut ngeia a siam, suzi-paratha-chhangban-thingpui leh a bal chhumte chu kan tan chuan a tluk hi a awm lo hrim hrim. Mi faten motor lem manto tak an tleipui zawh loh laia, Shaktimaan-a kawr intawm chunga ka u nen kan tlei theih zia te kha aw!!! Min awm tleina tur thil changkang mi nute angin nei lo mahse, ani aia fate ngaihtuahtu chuan a fate chu Pathian tluka a biak a ngai tawh hial ang. Ka nu hmangaihna zozaite hi ka damchhung pawhin ka rul zo seng dawn lo a ni, tih hre mah ila, ka theih ang tawka a lawmna tur thil tihsak erawh ka bat tlat a ni. Nang pawhin hetiang ang NU hi i nei ve mai thei. A thente chu Pathian hnenah an chawlhsak tawh che u pawh a ni mai thei bawk. Mahse, Pathian duhzawng hi kan nute duhzawng a nih miau avangin, Pathian duhzawnga nun leh hun hman hi kan nute hmangaihna kan chhanlet ve theihna awmchhun chu a ni. I nu khan i lak ata engmah phut a nei ngai lo; mahse, zawng zawng mahla he khawvelah hian ani tluka bat rulh phu dang i hmu chuang lo vang. Ka sen tet laia hmangaihna kut min hlantu, Aw-kà zaidam ka dawn hmasakna, Ka tah, ka nuih, ka nuar a danglo, Nunna chaw-tui kham mah ila, A duat erawh ka kham lo. Min thlamuantu chu Ka nu ngei a ni KA NU. Ka nunna chu Thlipui kawng te chu Danglamin, thingtin zar ata Thing hnahte chu tilin tla mahse, Ka nu hmngaihna erawh a ngai reng Ka mawi lai leh mawi loh lai te pawhin, Mualpho luata ka thih tlengin a ngai reng ang. Ka nu ka hmangaih che. Comment lamah kan nute ka hmangaih thu kan hrilh ve thei angem??? ©Dustin Sampler

Read more »

KA PA :

A Sakhming tlawmin hriat hlawh suh mahse,

Keia tan zawng a mawi ber e.

A phei chu dawhsanah khai thin suh mahse,

Ani tluk a mi-ropui an awm lo.

Sumpuiin inhmun bangsang din suh mahse,

A nun tluk zirlai tha a awm lo.

Pa dang angin khawvel daidar ve suh mahse,

A finnate chu ka tan a tawk e.

Natna khuma nghaisaka ka awm changtein,

Ani chu ka bulah a awm fova;

Thihna-in a bukpui lama min hnuh changin,

Ka tan HNENTU-a a au thin a.

Manganna thlipuiin min nuai chang pawhin,

A aw chu ka thla himna a ni.

Sa leh Sumah thang chhuah ve suh mahsela,

Kan runah erawh a chhuah e.

Thlaah ke nghatin a hming chuang lo mahse

Ka thinlungah hian a chuang e.


Hei hi ka pa duhtak min lo hriatsak ang che,

Ka hringnun HERO chu i ni e.

© Dustin Sampler

Read more »