(To be continue chhunzawmna…)
Damdawi mum lian, kan thianpa Zira chanchin hi kan sawi ngun
ta malh malh khawp mai. Fiamthu thawh thiam ni lem lo mahse, amah hmanga fiamthu thawh thiam erawh an
thahnem khawp mai. A ni hi sawi leh sawi hnu, mi danglam tak hi a ni ve hrim
hrim a, a kephah chhah lutuk te hi kan awmna tlangdungah chuan a hmingthan pui
a ni. A ke hi an chhah mai mai khawp a(h), a ke a lei an rah te hian a ke
zungtang te hian lei hi an tawk pha ngai ve meuh lova, an lo kawh ve mai mai
thin a ni. A chhah mai ni lovin a chang tel leh nghal a, tum khat pawh naupang
hovin Van Dame a bek khik (back kick) nat zia an lo sawi laih laih a, an zinga
pakhat chuan, “Au Zira ke phei chu nei se aw…” a lo ti pek a ni awm e.
Inkhelhnaah te hian ball boot a bun loh tum a nih chuan a lama tan kan inchuh
laih laih thin a nih tak kha maw.
‘KAN THIANPA ZIRA’N PALAI A TIR VE…’
“Satel pawh a vah a vah chuan a tawp a tawpah chuan a tum ram
a thleng nge nge thin,” an tih ang deuh khan, tum khat chu thianpa Zira chuan
kan veng nula hmeltha, Zopuii hnena palai tirh a rilruk ve ta tlat mai le...
“I ti thei bik mang e aw nang nge nge,” kan ti laih laih a, a ruk tak chuan awih harsa kan ti hlawm khawp mai. Kan veng nula chhuanvawr ve ber, kawngkawia han intawh chang pawh a vai hla sa chunga kan pelh deuh kher thin, kan thian za ho zingah pawh a hmel kawlhawk berin min han neih khalh tur chu lung a dam lo kher mai.
“I ti thei bik mang e aw nang nge nge,” kan ti laih laih a, a ruk tak chuan awih harsa kan ti hlawm khawp mai. Kan veng nula chhuanvawr ve ber, kawngkawia han intawh chang pawh a vai hla sa chunga kan pelh deuh kher thin, kan thian za ho zingah pawh a hmel kawlhawk berin min han neih khalh tur chu lung a dam lo kher mai.
Chutah le, zan a lo nih chuan thianpa Zira chuan kan venga
khabe sep thiam deuh ber tura a ngaih Pu. Mana, Pu. Thangthuama leh Pu. Awia te
chu Zopuii te ina va palai tur chuan an tir ta a le. Kan thianpa te inlamah
chuan chanchin ngai changin thenawm khawvengte chu an rawn inhawr khawm ve bawk
a. Kan lo phu ve laih laih mai a. Zan dar 9 thleng chuan chanchin chu kan lo la
ngai changa, mahse, a palai tirh te chu an la rawn thleng mai si lova, thianpa
Zira chu leikaah chuan a lo vei sek bawk a(h).
Khai le, palai te chu a tawp a tawpah chuan an rawn thleng
ta! Ngawi rengin inah chuan an rawn lut a, thuthleng seiah chuan an pathum
chuan an thu thap a. “Zira hi khawnge a awm?” a nu chu an zawt a. A nu chuan
Zira chu an auva, hmanhmawh takin thianpa Zira chu a rawn tlan chho nghal vat a,
“Mim kut thla chu a mi inneih ni tur atan chuan in ruat tak?” a rawn ti lut a.
Chutah pu Mana thinrim lutuk insum thei tawh lo chu mi tam thep thawp lai chuan
a ding ta thut mai a, a aw an then khak khak hnu chuan thianpa Zira chu an ko
hnai a, “Lalzirsang, saw nula saw a chunga I bawh vang hma chu vawi te khat mah
min tir tawh lovang che,” an ti ta mai a nih chu… Insum a har duh khawp mai kha
zan zet kha chu. Tir risk huai ve tek tek tak a ni.
‘HLIM RAWH U NUI RAWH U’ :
Zan khat chu khawhar inah zaikhawm turin kan thian za ho
chuan kan kal ve a. Thianpa Zira chu hlauhthawn lawk ang ngeiin duh aiin a rawn
zai tui fal leh ta a. Kan zai laklawh lai tak mai chuan a rawn ding chhuak ta
phut mai a le… “Kan then tak hi, thian ang tak taka ka lo en ve thin a nih vang
hrim hrim pawh hian a tana hla pakhat tal han thlan sak ve ka duh a, kan hla
hruaitute khan, ‘Kan Damlai Nite Hi Thihna Karah’ tih khan han la teh se,” a ti
a. A thupui atang chuan, "Tun tum pawh a che ‘Mokabula’ leh dawn a nih
hi," ka lo ti rilru a. A hla la hre ngai vak lo te chuan bawp khawkherha
phut ngar ngar chung chuan, “zai zel mai ang u,” an lo ti ve bawk a. Chutah kan
han zai tan ta a le… a thunawn kan han lut ta chu(h), “E e ekhai hlim rawh u
nui rawh u, Aha ha ha ha…” kan ti rual ta thup thup mai, mitthi pa te lai lai
khan, “vawi khat dang nui leh in a ha ha ha,” an rawn ti ta, kan kohhran upa
leh Pastor te pawh khan hreh tak chungin, “Ava zia lo ve aw…” ti ni awm taka
tukhum hiah pahin “vawi khat dang nui lehin…” an rawn ti leh lauh lauh mai
chu(h), insum a har duh khawp mai. Hla chang sawitu khan a sawi nawn lo chiang
teh e. Kha zan zet kha chu a ‘Zira Nite’ tih loh phal chi a ni hauh lo.
A DANGTE :
Tum khat pawh, “Zira mahni bialnu te chu hmangaih thu hrilh
fo hi a tha a nia,” kan ti a. A haw nal nal a, “Lalsang, my love you,” a zuk ti
ve hmaks maw le. Che morantic tiah tiah khawp mai.
Sawn a lo thlak ve ngei a, a chhungte chuan a sawn thlakna nu
chu nei turin an ti a, “Saw tiang nuthlawi mai mai ka nei duh chai lo ve,” a ti
daih mai mawle.
Tum khat pawh mi kel a ven hlawh ve a, a chhungte lak atanga
a indan hnu a lo ni chiah chiah bawk nen, duh aiin a petrol a lo thun full mah
mah te pawh a ni mahna, tuk khat chu
zing tawkah hian min rawn kai tho va. “Thianpa, kel hian mihring an nei ve thei
tho em?” a rawn ti ta nih chu(h)… Aw, kel lehlam pawh a lo sikundalai hreh lo
ni awm tak a ni. Kei lah chuan, “Thei e, thei e, thlahpawlh an nei thin maw
le,” ka lo tih sak a, khami ni atang kha chuan a hlauthawng ve ni ngei tur a
ni, a kel thlah tur kal awm reng reng hi ka hmu ngai ta lo.
Tum khat pawh nula rimnaah kan hruai ve leh alawm… Kan nula
rim chuan thingpui hang hi min lum sak a. Keini ho lah chuan in pah chuan
fiamthu titih hian, “A va thlum e… duh aiin chini a telh tam mah mah a nih dawn
hi,” kan ti a. Zira chuan an in ve ta a, “Ehe, ka ta chu a thlum ve miah lo,”
ring tawkin an rawn ti chhuak heu mai chu(h)… kan nula rim a zak chhe chiang
kher mai.
Tum khat phaia kan zin pawh, rel-ah laptop a chhar hlauh mai
a, ‘Boro Carculator’ tiin vai hnenah cheng 500 in a lo hralh hmiah maw le. Khua
hi a var lo thin khawp mai.
AND FINALLY…
Tum khat pawh mual khat leh lui pahnih meuh kanin kan thianpa
Zira lungleng lutuk awm ngaihna hre tawh lo chu chawfun nen meuh a bialnu kan
zuk rimpui ve alawm. Tlai lam dar 3 velah hian an khua chu kan thleng ve hlawl
mai a. An khua kan han luh chiah chuan thianpa Zira bialnu chuan khawlaiah
chuan tawlailir hi a lo khalh pek a (usshhh), kan hmuh lai reng chuan a brek a
fel nge ni a eksiden ta a, kawng sirah chuan a tlu thal tawp mai a. A bialpa
leh a thiante min han hmu thut mai chu,
tlema a zah ve deuh ka rin tehreng nen, a zak awzawng lo mai a, “Ti khan
lo awm lawk r’u aw…” a ti a, tuboh leh perek a zuk la a, a tawlailir chu an
chho bauh bauh ta a nih chu(h)… A va han tawih loh theih ngai em!!! Min champui
rei lo kher mai khami tum zet kha chu…
To be continue…
0 Ngaihdan:
Post a Comment