MITEN AN HMU VE LO - Laltanpuia Tochhawng

Nu chhul khawhar chhuahsana khawvel êng kan hmuh phat atang khan lâi hrui zai chah nâ leh tui sika bual avangin kan tap nghal a; hringnun kawng titoh tak zawh tan tura kailâwn rahbi hmasa berah bawh pawh bawkvak thei lova kan nau sawngnawi thut lai pawhin anchhe dawng HRINGNUN chuan a kut vawta min chelh a bâng chuang lo.

He anchhedawng Nun hrehawm tak pumpelh a, hringnun nuam zawk hmang thei tur hian ni tin-zan tin khawvel hi a buai phili thin a. Sakhuana hmanga rethei leh fahrah, chak lo leh ramtuileilo te chu thlamuan leh hnem hram hram an ni a; hun awl ninawm tiziaawm turin intihhlimna hrang hrang hmuhchhuah tumin Scientist rual an buai mup mup a; Social networking chi hrang hrang rawn thang chak tak takte hi ‘mihring hi amahin a tlei zo lo a ni’ ti chiangtu an ni.

Mahse, anchhedawng chu anchhedawng a ni a, pumpelhna kawng leh khân a awm lo! Mahse,.. mahse kan ti leh teh ang: Hringnun hian hlimna thuruk a nei a, chu chu scientist te thluak hmanga neih theih a ni lo va, mihring nuna Pathianin a dah lâwk dim diam a ni. Chu thil pakhat chu – mipa leh hmeichhe in-HMANGAIHNA hi a ni.


Bawihte I hmangaihna aw nem chuanin,
Ka thinlung hliam a thawi dam thin;
I ngilneihna leh rinawmna te chuan ni tin min tihlim thin.

A va dik em! Hna avang te, inchhungkhur buaina avang te, zirlai avang te, thenawm khawveng leh thiante nena kan inkar a buai avanga lungngaih buaina kan tawh changte hian hmangaihna hi a lo va hlu thin em! Laltanpuia chuan a thinlung hliam chu a hmangaih aw nem chauh pawhin a thawi dam thin niin he hlaah hian a sawi a, ni tin a hlim veng veng mai thin a ni.

I anka nêm chuan min tilawm thin a,
I lenthla leh kimtlangah chuan
Hmangaihna êng zûn a lo zam chiai e,
Miten an hmu ve lo.

Mi hmuh loh hmu ang hialah a inngai a, chu hlimna chu a thinhnuna zam chiai chiai ang hian a hria ni berin a lang. Mi thenkhatten hringnuna harsatna leh buaina, mi sual leh eirel hmangte hua leh rel reng renga hun an hman laiin ani erawh a Hmangaih nuna thatna leh duhawmna ringawt chuan a rilru a lâk avangin ‘mite hmuh ve loh’ amahah chuan a hmu kiau mai a, chu chuan hlim veng vengin a siam ta a ni.

A ha-hmai chu rual thapin a inrem tih a sawi lo va, a hnâr a bawh run leh run loh pawh a sawi lang lo. Ngil taka a din paw’n a ke leh ke inkarah football a len zan zan thu a sawi lo va, a vun rawng chu a buaina a ni lo. Chu nihna, hmeichhiain anmahni aidentiti atana an duh hauh loh tur chu a hmangaihi-ah chuan mite chuan lo hmu ve tehreng pawh ni se, a tan chuan chu chu buaina tham a tling lo. Ni e, amah ngeiin a sawi nawn awn awn reng a ni - “Miten an hmu ve lo.” A hmangaihi nuna duhawmna leh mawina chu amah chauhvin hmu thiam niah a inruat hmiah a, miin an sêlnate chu pawm ve a hnêkin a Hmangaihi duhawmna leh mawina hmu thiam ve lo nia a hriat avang chuan a nuihsawh zawk zamah a ni.

Ka hmangaihna hian ka ngen ta che a,
I thinlai pawh tui ang dam se;
Sial ang ka seilenna run chhungah hian
Kumtluangin par vul rawh.

 tiin a châng tawpnaah phei chuan a sawm hial a ni.

Chuti taka mawi leh duhawm chu hringnun timawitu leh tinuamtu niah a ngai a, kum hnih-khat mai pawh duhtawk lovin inthlahrung chung chungin kumtluanga a hmuh phaka awm fo turin a ngen ta hial a ni. Hei hi mipain hmeichhia a hmangaih theihna sang ber a ni. An tisa chên châk tawk lekin thenkhat chuan an hmangaih thin a, mahse chu hmangaihna chu mi tu pawhin an tih theih a ni.

Kan hla siamtu hmasate khan hringnun hi an lo hmu chiang thin khawp mai. Chu hringnun hmu chiang thei tur chuan miin ‘Hmangaihna’ hi a nihna dik tak a hriat hmasak phawt a ngai thin a ni.

Posted in: English Literature,Hmangaihna,LUAITHLI,LUNGLEN HUN,Mizo