KA LO TISUAL A NI...

Vawiin ka class kal tur chu ka in uluk ve khawp asin. Ka hmaiah cream kan hnawih a, ka zakhnuaiah Very Very Sexy body spray ngei mai chu kan phuh that that bawk a. Uluk takin darthlalang hlui tawh zet maiah chuan hmeltha ber niawm tak chuan kan in thlek vawng vawng a. Mahse, ka kawr te hi an lo va hlui tawh si em... Ka kekawr pawh hi kum hnih lai ka hak tawh a ni bawk a, a rawng ber pawh a hriat hleih theih tawh lo anih ber mai hi. Ka sam kan en leh a, Steel wool leh nawhfe inkara piang ni awm vela mawiin alo pheng no nghan mai a. Chutah, Ka ke kan han en thla leh a, pheikhawk hlui tawh tak, tet tuau mai hi alo in thawlh run mai a.

Tlangval dangte nalh theih zia leh neihnun bik zia ka ngaihtuah a, ka zak ngawih ngawih a ni ber. Ka thinlung chu vuina hlirin a khat a, ka chan tawk a lungawi thiam chu harsa ka ti ve kher mai. Mahse, ti hian ka ngaihtuah ta a : Mi pheikhawk ang ka nei pha ve lo pawh a ni mahna, mahse he khawvelah hian mi tam tak ka pheikhawk ang pawh bunna tur ke nei ve lo mi maktaduai tam tak an lo awm reng mai!

Bukna dik lo zawka ka lo inbuk thin avangin mi te hmaah sang taka buk kan in ka lo awm thin a lo ni. Kei aia neinung leh nei tam zawk te ka lo inbuk pui thin a, anni chuan sang takah mualpho takin min buk kang thin a lo ni. Mahse, tunah chuan tute nge ka in buk pui tur tih chu ka hrechhuak ve ta! Chhuanchham te, nu leh pa enkawltu tur nei ve lo te, hmangaihtu leh lainattu pawh nei ve ngai lo te, beiseina ten an kiansan tawh te, lusun leh mangang-khawhar te, kut leh ke nei ve lo te, khawvel mawina hmu ve thei lo mitdel te zawk in buk pui tur ka lo ni reng mai.

Tunah chuan hei hi ka chharchhuak ta, nun hlimna thuruk ngei mai chu. Nei tam lo mah ila, ka hlim a ni. Nei ve lo mah ila, ka khua a har tawh ngai lo vang, achhan chu buka dikah ka inbuk tawh miau a ni.