LA THLA RAWH :

Professor chuan an zirlai tan nan, a kutah chuan rialno a chhunga tui awm chu a keng va va a. Pindan chhunga awm zawng zawngte hmuh tur chuan sang deuh takah a keng a. 

“He no rih zawng hi engzah nge a nih in rin?” tiin a zawt a.

“Gram 100... Gram 50... Gram 150” zirlai naupangte chuan an inrinsiak laih laih a.

“A nihna takah chuan kei pawh hian ka buk phawt loh chuan a rih zawng ka hre thei mai bik lo a ni. Mahse, ka zawhna zawka chu – he tui/rialno hi minit enge maw zah keng ta ila enge thleng ang? tih hi a ni,” professor chuan a ti a.

“Engmah,” naupang chuan an chhang a.

“Awle, a tha e. A nih leh darkar khat ka kenin enge thleng ve ang le?” 

“I kut chu a kham hlein ka ring..” naupang pakhat chuan fiah kek kawk tak hian a rawn chhang a.

“Chhanna dik a ni. Awle, a nih leh nilengin he tui/rialno hi keng ta ila enge ka chungah thleng ang?” professor chuan a zawt leh a.

“ I kut chu a khamin a mu nasa hle ang. Tin, i tihrawlte a kham tentun anga damdawiina kal i ngai hial mai thei a ni...” naupang chu an nui huk a...

“A tha lutuk...
A nih leh, khang hun zawng zawngah(minit tlemte, darkar khat & ni khat) te khan he no rih zawng hi a inthlak angem?” professor chuan a tarmir dahthlak pah chuan a zirlai naupangte chu an zawt leh a.

“Aih,” an ti dual a.

“A nih, chutia a rih zawng a danglam chuang si loh chuan, a eng ber chuan nge ka kut chu ti kham/na ta ang le?”

Naupang chu an ngawi thuap a.

“ A nih leh, ka kut kham chu a reh theih na’n enge ka tih tak ang?” professor chuan zawhna a siam leh a.

“I no ken lai chu dah thla la a ni mai lawm...” an zinga pakhat chuan a rawn chhang a.

“Chhanna dik leh pawimawh tak a ni.
“Hetiang chiah hi mihring nuna harsatna leh tuarna pawh hi a ni.
I lu-ah khan rei lo te dah chhin la, eng teh ruai a thlen lo vang che. Mahse, rei deuh hlek i ngaihtuah hnu chuan a ti na ve deuh ang che. A aia rei i vawn phei chuan, na takin a siam ang che.”

“Kan nuna harsatna leh dodalna kan tawhte ngaihtuah leh hriatchian hi thil pawimawh tak a ni. Mahse, chu aia la pawimawh zawka chu, kan ngaihtuahna ata lak sawn hi a ni. Zantin i ban a kham hmain, i mut hma ngeiin la sawn thin ang che. 

“Chuti a nih chuan, zingah hahdam leh chak tha takin i tho leh a nga, i hma harsatna leh dodalnate chu tha thar nen i bei leh thei dawn a ni,” zirtirtu chuan a chhang a.

Posted in: hringnun,Hringnun Darthlalang,Mizo,Morale