Ka Diary Manto Tak Mai Chu, Episode – II: (very very Sexy leh a dangte)

A thawhkhatna ah Computer chungchang te, Kawi lawh chungchang te leh Phai a zin chungchang te kan lo nuihpui ham ham tawh a, tun tumah pawh hian kan nuapan lai hun (ti ve khanglang ila) ka damchhunga ka theihnghilh leh ngai tawh loh tur, ka hun tawn nuihzatthlak tak tak te ka rawn ziak leh chiam dawn a ni.

VERY VERY SEXY BODY-SPRAY :

Pathian zarah enthla miah lovin (!!!) ‘Matric’ an tih chu kan pass ve ta a. Matric pass nih chu alo nuam kher mai. Kan barel pawlah ‘Dustin LKPA Martic Passed’ tih kan ziak kuau mai a,
thian te chuan min ngaisang ve thei asin aw (a hunlai kha chuan). Aia u zawk ten mikhual nula rim tur ten min han chhuahpui ve zeuh zeuh tan ta a. Fa tlum ber mah ni ila hmeichhe danglam bikna te chu ka hre ve kar tawh. ‘Fair and Lonely’ tih te kan han hmang ve zeuh zeuh tan a, tin a kah rimtui lamah pawh Cobra, Darling, My Dear, tih vel te kan han hmang ve ta a.

Nikhat chu ka pa hnenah chuan U Sawma body spray ang chu min leisak ve turin ka ngen a. Kapa chuan alo hre awzawng lo mai. A tir phei chuan, “I u sawma chu va in then tir la nimai lawm,” alo ti sam et a. A hming ka hrilh chuan khaini a hmuam veleh a theihnghilh leh nghal mai dawn tih ka si a, mahse engtin nge ka hrilh chuan ang tia ka inngaihtuah buai mek lai chuan TV-ah chuan ka duh ang chi ngei mai, ZATAK body spray tih chu an lo fak hlauh mai a. Ka pa kawr ban ah chuan ka phih a, “khi, khitiang khi naktuka phai a I kal hun chuan minlo hawn ngei ngei ang che..” kati a. Ka pa pawh chuan awlsam tak chuan, “ni e,” a ti ve mai a.

Zanin chu Pu.Mana te mikhual nula kan rim ve teh ang :

Ka pa chu ka thilchah leitur chuan kan dawr than deuh mai, Vai Maruari dawr ah chuan a kal ngei ta a. Ka hlauh ang ngeiin a hming chu a zuk theihnghilh leh pek ta! Vai dawrkai chuan, “eng I duh a?” alo ti a, kapa chuan an ngaihtuah vang vang a, “Very Very Sexy body spray a awm em?” an ti ta nih chu!!! Vai Maruari pa pawh chu a bo chiang kher mai.  Vaipa chuan a thil zuar te chu an enkual thin, ‘Very Very Sexy Body Spray’ reng reng a hmu bawk silo. “A..khai kei chuan ka nei lo aniang, dawr dangah sawn va en leh mai ta che,” a ti tak ringawt mai a.

Ka pa chuan chumi ni chuan nilengin phai nisensa hnuaiah chuan, ‘Very very sexy body spray’ zawng chuan a vak nileng thak zuk nia mawle.  ‘Pack-Face’ hmanga a lo tihbuai hrep tawh vai ho chu a vawihnihna atan ‘very very sexy body spray’ hmangin a zuk tibuai leh ta a ni.

PUITLING FILM KAN EN VE A…..

Tum khat chu kan thianza hovin Pu.Mana te inah TV en turin kan kal a. Mahse, an in kan thlen chuan kawngka alo inkalh thap mai a(Anni chauh hi kan veng a Video Player nei awmchhun an nih avangin film thar an neih chuan a man awm lo chuan en an phal ngai lo). En kan chak ve em avang chuan an kawmthlang lamah chuan kan chhuk thla ta a. Vanneihthlak deuh maiin kut zungchal vel leng chiah chiah hian an bang chu alo pawp hlauh mai a. “Zira nang han bih hmasa ber rawh,” kan ti a. Zira chuan thawmdim tak in a han bih de de a. Pu Mana te nupa chuan puitling film anlo en a nih kha, Zira chuan a hrethiam lo kher mai. “Eheee khi nu khi a thi dawn a ni awm e……a changtunu pawh a thi tep tawh a tawp tawh dawn a niang, a te tuar tuat mai,” a rawn ti pek a, kan thian za ho chuan, “aa chutia tawp teuh tawh na na na chu bih buai ve ting tang lo mai ang,” tiin inkawibah turin kan kal daih a nih tak kha.

KAN THIANPA ZIRA BAWK KHA….

Thianpa Zira hi chu midanglam tak a nih ang bawk in a mawl leh at dan pawh hi a danglam bik hle a ni. Kei chuan mi bik a niin ka hria (A ‘mi bik’ nih dan hi a lawmawm nge lawmawm loh lam anih phei chu ka hre bik lo hauh lo).

Tum khat chu kan thian za hovin inkhel chungchang kan sawi khawm a. Champions leaque final khelh tuk a ni bawk a, titi pawh a kal kher mai. Nidang ang bawkin Zira chu titi vawrtu ber a ni leh a. Mahse, tun tuma a zawhna rawn zawh pawh hi a har leh pek kher mai. Inkhel hre mi, Clyde Chelsea, Andy Gray tih vel pawh in (Gerrard-a Pa pawh ni raw sek sek) a ngaihna an hriat bik ka ring hauh lo. “ ‘Away’ hi eng home nge?” a rawn ti leh pek a nih chu!!! Chhan a har duh kher mai. Players hming lah hi an hre teuh thei mai mai khawp ah, Manchester United player, Giggs pawh hi ‘Jigs’ zu han ti tlat pek a. Chutiang zelin tun thleng hian, ‘De Gea’ tih te pawh ‘De Gaia,’ ‘Gibbs,’ pawh ‘Jips,’ tin, Wembley Stadium pawh ‘Wimbledon Stadium’ zu han ti tlat pek a.

Tum khat Camping kan luh tum pawhin kan councellor te nena bethel-na hun kan neih tum pawhin ‘Malsawm Tawngtaina’ in min thlah thlap tawh a nih kha. A tawngtai rei ber a, chu chu remchangah hmangin malsawm tawngtaina in campers ho zawng zawng min thlah a nih kha. “Pa Pathian hmangaihna te, Fapa Isua Krista khawngaihna leh…….” an tih lai vel kha chuan in sum a har duh kher mai.

Tum khat chu kan science Sir. in nawt min pek laiin thianpa Zira pen tui chu a zo hlauh maia, a aiah ‘scetch pen’ in namen lova lian in a ziak vak mai a. Kan Sir. chuan, “nga tinge khatianga I ziah vak?” tia an zawh chuan Zira chu a ngawi vung vung a, “My pen water is not going,” a rawn ti chhuak heu mai a, insum a har duh khawp mai. Kan Sir. pawh chuan hauh nachang pawh chu a hre tawh lova,  a nui ringawt mai mawle (A harthlak thei ania).

Thianpa Zira hi Pu J.F-a te ang bawk a sap tawng let thiam hmingthang tak a ni a, a hnuaia hian a thu leh thenkhat lar zual te kan lo tarlang ange:

• Welcome = Tuichhunchhuah atanga lo chhuak
• Ni khua lo = Sun no village
• Ketaminu = Many legs mother
• Ka ei tlukin ka lawm = I eat equal to thank you

June 20th, 2012

 

to be cont…

Posted in: Fiamthu,LUNGLEN HUN,Mizo,Remembrance