Ka Rilrem zawng Player te :

Khawvelah inkhelh thiam avanga millionaire ni ta, mi maktaduai chuang an awm tawh a, a thente phei chu khawvel awmchhunga hming dai ngai tawh lo turte an ni. Dai tawh lo tur khawpa hming chhertu chuan inkhelh a thiam hle a ngai a, chu chu a hausakpui pawh a ni reng a ni.

Mahse, mite aia chungchung fal em em pawh ni lo, an khawsakdan leh an chezia a danglam em avanga beisei aia lar leh sum huilut hnem erawh tam tak an awm thung. Heng zinga ka duh em em, an inkhel ai pawha an chezia ka lawm zawk, an nungchang leh khawsakzia ka lawm em em player, ka kutzungtang thliakin kan rawn chhiar diat diat ange :

Paul Scholes :

Tul hle lovah chuan a tawng mai mai lova, a ngaihdan a pelh hunah erawh a ngaihdan chu card a hmuhpui thawt thin.

Ding chung pawha e pherh zo lo awm vel ni mahse, a tul hunah chuan a ‘te’ a ni, tih a theihnghilh mai thin. A luhlul a, mahse, ani tluka mirinawm hi he khawvelah hian an awm a nih ngai pawhin, Isua zirtirte zingah khan an hming a lan ve ngei a ngai ang.

Tawng tam lo, thiam em em nei si lote hi ngaihsan chakawm viau mahse, ngaihsan tak tak an har thin. He sam buanga erawh hi chu a pian phu lohva ball pet na thei chungchuang a ni a, hei baka a inkhel en tinuam em emtu chu, a duh duhna hmuna ball a pet thiam hi a ni. A club, Manchester United tan a rinawm hle a, nikum hmasaa a club a hmangaih luat avanga mualphothlak taka mipui hmaa inkhelh a chawlhsan tawh thu puang  vek tawh si a rawn kir leh ta mai pawh kha a demawm lohna chin a awm awm e. “Min leichhuah in duh tak tak a nih chuan Manchester United club hi in lei a ngai ang,” hei hi amah lei tuma dawrtute a chhan thinna a ni.

A che a simple a, a thuamhnawm a simple a, a khawsakzia en pawhin millionaire nungchang a pu thlawt lo a ni. Hei hi ka duh em emna chhan pawh a ni. Season hmasaa United tana a rawn kir leh khan, a jersey nambar hak thin (No. 18) a rawn diman lova, a ball boot sponsor-tu NIKE hnenah pawh kal lovin, amah bun tur boot chu amah ngeiin cheng 2000 awrh chauh sengin bazaar-ah a va lei a ni. He nun hi mi zawng zawng ropui kan tih thin kha a ni.

Thierry Henry :

Sakhi tuai ngal ang maia ria thang mai chuan ball chu hnehsawh zetin a thai kual zat zat a, chak tak leh hnehsawh takin ball chu a tlanpui a, lehlam defender tan chuan laksakchi awzawng a ni lo. Chutah a mamawh tawk hun remchang a neih hnuin muang ban chatin goal-ah a pet a, ball kal chak lo mahse lehlam goal veng tan man phak loh chiah chiaha a kal avangin net chu a puar nghal pawp a.

Fan-te lawmluat avanga an rik teng tung lai chuan, a ti goal-tu ber chu a tum hmukin a dinna ngaih chuan a ding a, goal chhunga a pet luh ball kha mit khap miah lovin a en vang vang a... Hei hi Thierry Henry mite’n an ngeina chhan chu a ni. Mahse, he chetze dangdai lutuk hi amah min atchilhtirtu chu a ni tlat si!

Baga-ah emaw Silchar khaw dai fem-ah emaw leirawhchan a thiar lai vel chu hmu ila, he French tukhum pawng-a hi ‘hmeltha’ ka ti bik hauh lo vang. Mahse, hmel ti thatu hi vun a nih ngai leh, vun ti no/eng-tu hi taksa chhung lam atanga rawn chhuak a nih ngai chuan, Thierry Henry-a taksa chhunga thiamna leh theihna awm zo zaite hi a hmel ti thatu chu an ni ngeiin ka ring. Tunah chuan vawi thum pawh piang tha leh dawn pawh ni ila, amah anga inkhel thiam pawh ni dawn lo mah ila, Henry-a hmel ang put hi ka hnial hauh lo vang.

Field chhunga a che vel hi a hmuhnawm a, a style dangdai leh ngaihzawnawm tak tak te hi tihtak zeta I en ve thin a nih ngai chuan hepa ngaisang leh duh lo hian I hnutchah hun I nghah thlen theih ka ring bik hauh lo.

David Beckham :

A chunga mi pahnih ngaisangtu ka nih vang khian, ka mihring duh chi chu – simple, chetze danglam deuh torah in lo ngai mai thei. A pawi lo ve, inti sual tam chuang hlei nem.

Nulate ngaihzawn rawn a nih vang leh, a hmel inrem fuh em avanga duh leh ngaisang ka ni lova, mi rinawm leh zahtlak a nih vang zawka ngaisang ka ni. Tin, he khawvel mipui favai leh tiaua vaivut zat ngawta tam zinga ui hum zah lek tena an neih, chetze danglam bik – ‘Kawnfidens tha chi’ a neih vang hian ani hming lam lova football sawi hi nuam ka ti tak tak thei lo a ni.

Manchester United-a a awmlai khan an pu, Alex ferguson-a nen khan vawi duai lo an inti thiam lova, thinrim tunin Manchester United pawh a chhuahsan a ngaih phah hial a nih kha.  Mahse, kum a vei a, a veil eh a, a han vei a han vei hnu pawhin, a hmangaih ber chu Manchester United tho a ni a, Alex-a chu khawvel manager piang tawh zinga a ngaihsan ber a la ni cheu. Heti khawpa mipuitling a nih vang hi a ni mahna, poll-a mipui ngaihdan an laknaah pawh ani hi hmeichhe hovin pasala ngeih an chak ber chu a ni.

Awle, mi tam sawi hun ni se chu anni hnungah hian mi tam tak mensawn tur ka la nei ngei ang. Mahse, tun tum atan chuan hemi chinah hian I duhtawk hrih phawt mai ang u. Heng player ka rawn tarlan takte hi ngun takin an mizia leh an nihnate ngaihtuah la, I player ngainat zawng an ni ve chiah em, tih chu kawmen lamah I rawn sawi ve dawn nia. Ka lawm e.

Posted in: Football,Infiamna Khawvel,Mizo