ISUA KUTAH :

Sipai pakhat hian a nupui thar chu an ram lamah hawpui a tum a. An hmaah chuan lui lian tak kân tur a awm a. Chu luipui chu inkar kâi tumin lawnglêngah an chuang a.

Chutia an chuan lai chuan, thawklehkhatah thlipui a rawn thawk ta phut mai a. An chuanna lawng chu nasa takin a rawn nuai ta a.

Thlipui chuan an chuanna lawng chu a sawisak nasat êm avangin, a nupui chuan a hlau hle a. Beisei tur nei tawh lovah a inngai a ni. Mahse, a pasal erawh chuan hlau hmel pawh a pu lo.

Thli chu a chakin a na hle a, an chuanna lawng erawh a lian lo hle a. Lawng chu engtik lai pawha pil mai thei a ni. Mahse, sipai chuan engmah thleng lo ang hmiahin thlamuang takin a thu reng a. Eng thu mah a sawi lo.

Mahse, a nupui chuan a hlau nasa mai si a, aw khur hlawk hlawk chung chuan a pasal chu, “Hlauhna chhe tê pawh i nei ve nange? Vau kam kan inkar kâi zo dawn lo tih a lang reng hi. ‘Nge i â tawh zawk?” tiin a vin tuar tuar a.

A Pasal chu a nui hak a. A kâwnga a pâi, a ngûnhnâm chu a rawn phawrh a.

Hmeichhia chuan mak a ti zual deuh deuh va.

Pasal chuan a chem chuan a nupui chu a tin a, a nghawng bulah chuan a chem chu a lek a. A nghawng chu a zai pha lek lek a.

“I hlau em?” tiin a nupui chu a zawt a.

Hmeichhia chuan, “Eng thil nge mawn le I tih tak le? Eng vangin nge maw ka hlauh teh lul ang. Ngûnhnâm kha i kutah a awm tih ka hria alawm, nang chuan min hmangaih tih ka hria alawm...” nui deuh chung chuan a chhang a.

Chu veleh a pasal chuan a ngûnhnâm chu a paina kâwmah a thun leh a, heti hian a sawi ta a : “Kha kha ka chhanna chu a ni. Isua’n min hmangaih tih ka hria a, he thlipui hi a kutah a awm a ni, tih ka chiang bawk a ni,” a ti ta rauh va.

Kei leh nang hian hlauh kan la nei em? Kan hmaa harsatna tam tak lo inlâr thinte hian kan thinlung ti hlau suh se. Pathian kutah an/kan awm a, ani chuan a hmangaihte chu a enkawl hneh em em thin a ni. Tin, kan rin Isua hi a ring ngamtute tan chuan rintlâk Pathian a ni, tih hi i hre thar leh ang u.

Posted in: Christianity,hringnun,Hringnun Darthlalang,Mizo